ലണ്ടൻ: ലോകത്തെ ഏറ്റവും പഴക്കം കൂടിയ അപൂർവ കോന്യാക് മദ്യ കുപ്പിയ്ക്ക് ഓൺലൈൻ ലേലത്തിൽ ലഭിച്ചത് 118,580 പൗണ്ട് (ഏകദേശം 1,10,21,710 രൂപ )! 1762ൽ നിർമിക്കപ്പെട്ടതാണ് ഈ കോന്യാക് മദ്യം. കഴിഞ്ഞ 140 വർഷമായി ഒരു ഫ്രഞ്ച് കുടുംബ നിലവറയിൽ സൂക്ഷിച്ചിരുന്നതാണ് ഈ മദ്യം. ഇതേ വരെ ലേലത്തിൽ പോയിട്ടുള്ളതിൽ വച്ച് ഏറ്റവും വിലമതിച്ച കോന്യാക് കുപ്പിയാണിത്. ഒരു ഏഷ്യക്കാരനാണ് വൻ തുകയ്ക്ക് ഈ മധ്യകാലഘട്ട കോന്യാകിനെ സ്വന്തമാക്കിയതെന്നാണ് വിവരം.

ലോകത്തെ ഏറ്റവും പഴയ ഫ്രഞ്ച് കോന്യാക് നിർമാതാക്കളായ ഗോട്ടിയർ കോന്യോക് ആണ് ഇപ്പോൾ ലേലത്തിൽ പോയിരിക്കുന്ന കോന്യാകിന്റെ നിർമാതാക്കൾ. ഗോട്ടിയറിന്റെ ഏറ്റവും പഴക്കം ചെന്ന മൂന്ന് അപൂർവ കോന്യാക് ബോട്ടിലുകളാണ് ഇന്ന് അവശേഷിക്കുന്നത്. അതിൽ ഒന്നാണ് ഇതും. മറ്റു രണ്ടെത്തിനും ഇപ്പോൾ ലേലത്തിൽ പോയിരിക്കുന്നതിന്റെ അത്ര വലിപ്പമില്ല. ഒരു കുപ്പി ഫ്രാൻസിലെ ഒരു മ്യൂസിയത്തിലാണ് സൂക്ഷിച്ചിരിക്കുന്നത്. മറ്റേത് 2014ൽ 48,000 പൗണ്ടിന് ( ഏകദേശം 44,65,849 രൂപ ) ലേലത്തിൽ വിറ്റിരുന്നു. 258 വർഷം പഴക്കമുണ്ടെങ്കിലും ഇപ്പോൾ ലേലത്തിൽ വിറ്റിരിക്കുന്ന ഈ കോന്യോകിന്റെ രുചിയ്ക്ക് പഴക്കമേറിയിട്ടില്ലെന്നാണ് അധികൃതർ പറയുന്നത്. കുപ്പി ഇപ്പോഴും സ്ട്രോംഗാണ്.