ആലപ്പുഴ:കി​റ്റ്‌സ് മാനേജ്‌മെന്റ് കോഴ്‌സുകളിലെ പിന്നാക്കസമുദായ വിദ്യാർത്ഥികൾക്കുള്ള ഗ്രാന്റ് മുന്നറിയിപ്പില്ലാതെ നിറുത്തലാക്കിയ നടപടി പുന:പരിശോധിക്കണമെന്ന് എസ്.എൻ.ഡി.പി യോഗം ശ്രീനാരായണ സമഭാവന സംസ്‌കാരിക കേന്ദ്രം ആവശ്യപ്പെട്ടു.
2018-19 വർഷം കി​റ്റ്‌സിൽ (കേരള ട്രാവൽ ആൻഡ് ടൂറിസം സ്​റ്റഡീസ്) എം.ബി.എ,ബി.ബി.എ കോഴ്‌സുകളിൽ ചേർന്ന ഒ.ബി.സി വിദ്യാർത്ഥികൾക്കാണ് 2019-20, 2020-21 വിദ്യാഭ്യാസ വർഷങ്ങളിൽ ആനുകൂല്യം നിഷേധിക്കപ്പെട്ടത്. സംസ്ഥാന വിനോദ സഞ്ചാരവികസന വകുപ്പിന് കീഴിലാണ് കേരള ട്രാവൽ ആൻഡ് ​ടൂറിസം പ്രവർത്തിക്കുന്നത്. 2018-19 വർഷം ഗ്രാന്റ് ലഭിച്ച വിദ്യാർത്ഥികൾക്ക് തുടർന്നുള്ള വർഷങ്ങളിൽ ലഭിച്ചില്ല.ഇത് സംബന്ധിച്ച് കി​റ്റ്‌സ് വകുപ്പ് മേധാവി നിരന്തരം കത്തെഴുതിയതിനെത്തുടർന്ന്, ഗ്രാന്റ് നിറുത്തലാക്കിയതായി ചീഫ് സെക്രട്ടറി ബിശ്വനാഥ്‌സിൻഹ ഉത്തരവ് പുറപ്പെടുവിച്ചു. ഇത് കടുത്ത അനീതിയാണ്.

സ്വന്തമായി ഫീസ് അടയ്ക്കാൻ നിവൃത്തിയില്ലാത്ത കുടുംബങ്ങളിലെ കുട്ടികളാണ് ഗ്രാന്റ് പ്രതീക്ഷിച്ച് കോഴ്‌സിൽ ചേർന്നത്. ആദ്യത്തെ രണ്ട് സെമസ്​റ്ററുകളിലും ഗ്രാന്റ് ലഭിക്കുകയും ചെയ്തു.എന്നാൽ കോഴ്‌സ് പൂർത്തിയാക്കാനാവാത്ത വിധം അപ്രതീക്ഷിതമായി ധനസഹായം നിറുത്തലാക്കിയതോടെ വിദ്യാർത്ഥികളുടെ ഭാവി ആശങ്കയിലായിരിക്കുകയാണ്.മുഖ്യമന്ത്റിയും ബന്ധപ്പെട്ട വകുപ്പ് മന്ത്റിമാരും അടിയന്തിരമായി ഇടപെട്ട് ഈ ഗ്രാന്റ് അനുവദിച്ച് വിദ്യാർത്ഥികളുടെ പഠനം തുടരാൻ അവസരം ഒരുക്കണമെന്നും പിന്നാക്ക ക്ഷേമ വകുപ്പിന്റെ ദൈനംദിന പ്രവർത്തനത്തിന് ജനസംഖ്യാനുപാതികമായ തുക ബഡ്ജ​റ്റിൽവക കൊള്ളിക്കണമെന്നും എസ്.എൻ സമഭാവന സംസാരിക കേന്ദ്രം കോ-ഓർഡിനേ​റ്റർമാരായ പി.വി.രജിമോൻ, എസ്.അജുലാൽ എന്നിവർ പ്രസ്താവനയിൽ ആവശ്യപ്പെട്ടു.