ആലപ്പുഴ: ജില്ലയിലെ ജൈവവൈവിദ്ധ്യ സംരക്ഷണ രംഗത്തെ അനുകരണീയ പ്രവർത്തനങ്ങൾക്കുള്ള വനമിത്ര അവാർഡിന് സംസ്ഥാന വനം വന്യജീവി വകുപ്പ് അപേക്ഷ ക്ഷണിച്ചു. 25,000 രൂപയും ഫലകവും അടങ്ങുന്നതാണ് അവാർഡ്. പരിസ്ഥിതിയും ജൈവവൈവിദ്ധ്യവും പരിരക്ഷിക്കുന്നതും വർദ്ധിപ്പിക്കുന്നതുമായ പ്രവർത്തനങ്ങൾക്കാണ് അവാർഡ്. വ്യക്തികൾ, വിദ്യാഭ്യാസ സ്ഥാപനങ്ങൾ, സന്നദ്ധ സംഘടനകൾ, കർഷകർ, പരിസ്ഥിതി പ്രവർത്തകർ തുടങ്ങിയവരെ അവാർഡിനായി പരിഗണിക്കും. താത്പര്യമുള്ളവർ ആലപ്പുഴ സോഷ്യൽ ഫോറസ്ട്രി ഡിവിഷൻ ഓഫീസിൽ നിന്നു ലഭിക്കുന്ന നിശ്ചിത അപേക്ഷഫോം പൂരിപ്പിച്ച്, അപേക്ഷകൻ ചെയ്തിട്ടുള്ളതും ചെയ്തു കൊണ്ടിരിക്കുന്നതുമായ ജൈവവൈവിദ്ധ്യ സംരക്ഷണ രംഗത്തെ പ്രവർത്തനങ്ങളുടെ വിശദമായ റിപ്പോർട്ടു സഹിതം 30ന് വൈകിട്ട് 5ന് സോഷ്യൽ ഫോറസ്ട്രി ഓഫീസിൽ സമർപ്പിക്കണം. ഫോൺ: 0477 2246034.