ആലപ്പുഴ: എം.സി റോഡിൽ ചെങ്ങന്നൂർ എൻജിനി​യറിംഗ് കോളേജ് ജംഗ്ഷനിൽ വാഹന യാത്രക്കാർക്കും കാൽനടയാത്രക്കാർക്കും ഭീഷണിയായി തീർന്നിട്ടുള്ള ഡിവൈഡർ പരിശോധിച്ച് അപകട ഭീഷണി ഒഴിവാക്കണമെന്ന് സംസ്ഥാന മനുഷ്യാവകാശ കമ്മി​ഷൻ. ദേശീയപാത പൊതുമരാമത്ത് വിഭാഗം എക്‌സിക്യൂട്ടി​വ് എൻജി​നി​യർമാരും ചെങ്ങന്നൂർ നഗരസഭാ സെക്രട്ടറിയും ആവശ്യമായ നടപടികൾ അടിയന്തിരമായി സ്വീകരിക്കണമെന്ന് കമ്മി​ഷൻ ജുഡീഷ്യൽ അംഗം പി. മോഹനദാസ് ആവശ്യപ്പെട്ടു. നാലാഴ്ചയ്ക്കകം റിപ്പോർട്ടു സമർപ്പിക്കണമെന്നും കമ്മി​ഷൻ ആവശ്യപ്പെട്ടു.
പന്തളം ഭാഗത്ത് നിന്ന് വരുമ്പോൾ ജംഗ്ഷന് സമീപമാണ് ഡിവൈഡർ സ്ഥാപിച്ചിട്ടുള്ളത്. ഡിവൈഡറിലേയ്ക്ക് വാഹനങ്ങൾ ഇടിച്ചുകയറി നൂറ് കണക്കിന് അപകടങ്ങളാണ് സംഭവിക്കുന്നത്. ഡിവൈഡർ നീക്കം ചെയ്യണമെന്ന് ജസ്റ്റിസ് ചന്ദ്രശേഖരദാസ് കമ്മി​ഷൻ നിർദേശിച്ചിരുന്നെങ്കിലും നടപടിയെടുത്തിട്ടില്ലെന്ന് പ്രദീപ്‌കോശി സമർപ്പിച്ച പരാതിയിൽ പറയുന്നു.