വള്ളികുന്നം: കൊവിഡ് സ്ഥിരീകരിച്ചു 10 ദിവസമായി ചികിത്സയിലായിരുന്ന മലയാളി സൗദിയിലെ റിയാദിൽ മരിച്ചതായി ബന്ധുക്കൾക്കു വിവരം ലഭിച്ചു. വള്ളികുന്നം പുത്തൻചന്ത പറപ്പാടി വടക്കതിൽ മോഹനന്റെ മകൻ മനോജ് (40) ആണ് മരിച്ചത്. ഒരാഴ്ചയായി പനി ബാധിച്ചു ചികിത്സയിലാണെന്നാണ് മനോജ് വീട്ടിൽ അറിയിച്ചിരുന്നത്. തിങ്കളാഴ്ച രാത്രി വീട്ടിലേക്ക് വിളിച്ച് അസുഖം കുറവുള്ളതായും അറിയിച്ചിരുന്നു. ഇന്നലെ രാവിലെ നെഞ്ചുവേദന അനുഭവപ്പെട്ട മനോജിനെ ആശുപത്രിയിലെത്തിച്ചെങ്കിലും മരിച്ചു.

വിവരം മനോജ് ജോലി ചെയ്തിരുന്ന കമ്പനി അധികൃതരാണ് വീട്ടിൽ അറിയിച്ചത്. പത്ത് ദിവസം മുമ്പ് നടത്തിയ പരിശോധനയിൽ മനോജിനു കൊവിഡ് പോസിറ്റീവായിരുന്നെന്നും രണ്ടാമത്തെ പരിശോധനാ ദിവസമാണ് മരണം സംഭവിച്ചതെന്നും കമ്പനി അധികൃതർ അറിയിച്ചു. രണ്ടാമത്തെ പരിശോധനയ്ക്കായി സ്രവം എടുത്തിട്ടുണ്ട്. ഫലം നെഗറ്റീവാണെങ്കിൽ മാത്രമേ മൃതദേഹം നാട്ടിലേക്ക് കൊണ്ടുവരാൻ കഴിയൂ. 20 വർഷത്തോളമായി ഗൾഫിൽ ജോലി ചെയ്യുന്ന മനോജ് 3 വർഷം മുമ്പാണ് സൗദിയിലെ റിയാദിലെത്തിയത്. ഭാര്യ: വിദ്യ. മാതാവ്: രാജമ്മ.