ചേർത്തല: വഴിത്തർക്കത്തെ തുടർന്ന് വയോധികൻ കൊല്ലപ്പെട്ടത് തലയ്ക്കേറ്റ ക്ഷതം മൂലമാണെന്ന് പോസ്റ്റ്മോർട്ടം റിപ്പോർട്ട്.

ചേർത്തല തെക്ക് പഞ്ചായത്ത് ഏഴാം വാർഡ് ആലുങ്കൽ മ​റ്റത്തിൽ മണിയൻ (78) ആണ് അയൽവാസികളായ സഹോദരങ്ങളുടെ ആക്രമണത്തിൽ കൊല്ലപ്പെട്ടത്. സംഭവുമായി ബന്ധപ്പെട്ട് പിടികൂടിയ കിഴക്കേ ആലുങ്കൽ നികർത്ത് സുന്ദരേശ്വരറാവു (40), സഹോദരൻ ശ്രീധരറാവു (30) എന്നിവരെ ചേർത്തല ജുഡിഷ്യൽ ഫസ്​റ്റ് ക്ലാസ് മജിസ്‌ട്രേ​റ്റ് കോടതി രണ്ടിൽ ഹാജരാക്കി റിമാൻഡ് ചെയ്തു.കൊവിഡ് പരിശോധനയ്ക്ക് വിധേയരാക്കിയ പ്രതികളെ കായംകുളത്ത് പൊലീസ് നിയന്ത്രണത്തിലുള്ള നിരീക്ഷണ കേന്ദ്രത്തിലാക്കി. 14 ദിവസത്തിന് ശേഷം ഇവരെ ജയിലിലേക്ക് മാ​റ്റും.

വീട്ടുമു​റ്റത്തുകൂടി പ്രതികൾ ബൈക്ക് ഓടിച്ചത് മണിയൻ ചോദ്യം ചെയ്തതാണ് സംഘർഷത്തിന് കാരണമായത്. അടിയേ​റ്റുവീണ മണിയനെ നാട്ടുകാർ ചേർന്ന് ആശുപത്രിയിലേക്ക് കൊണ്ടുപോയെങ്കിലും വഴിമദ്ധ്യേ മരിച്ചു. മദ്യലഹരിയിലായിരുന്ന പ്രതികളെ അവരുടെ വീട്ടിൽ നിന്നാണ് പൊലീസ് അറസ്​റ്റ് ചെയ്തത്.