ആലപ്പുഴ: കഴിഞ്ഞ കുറച്ച് ദിവസങ്ങളായി സംസ്ഥാനത്ത് കൊവിഡ് രോഗികളുടെ എണ്ണം ക്രമാതീതമായി വർദ്ധിക്കുന്നതിനാലും, സാമൂഹ്യവ്യാപനത്തിന്റെ ആശങ്ക നിലനിൽക്കുന്നതിനാലും സംസ്ഥാനത്തെ ഹോട്ടലുകളിൽ കൂടുതൽ ജാഗ്രത പാലിക്കണമെന്ന് കേരള ഹോട്ടൽ ആൻഡ് റസ്റ്റോറന്റ് അസോസിയേഷൻ നിർദ്ദേശം നൽകി. ഉപഭോക്താക്കളെ ഹോട്ടലിനകത്ത് ഇരുത്തി ഭക്ഷണം വിളമ്പുന്നത് കഴിവതും ഒഴിവാക്കുവാൻ ശ്രമിക്കണം. ഹോട്ടലുടമകളും, ജീവനക്കാരും മുൻകരുതൽ നടപടികൾ സ്വീകരിക്കണമെന്ന് നിർദ്ദേശം നൽകിയതായും അസോസിയേഷൻ പ്രസിഡന്റ് മൊയ്തീൻകുട്ടി ഹാജിയും ജനറൽ സെക്രട്ടറി ജി. ജയപാലും അറിയിച്ചു.