എടത്വാ: വീട്ടിൽ കൊവിഡ് നിരീക്ഷണത്തിലിരിക്കെ നാട്ടിൽ കറങ്ങിനടന്ന യുവാവിനെ പൊലീസ് പിടികൂടി പെയിഡ് ക്വാറന്റൈൻ കേന്ദ്രത്തിലേക്ക് മാറ്റി. ദുബായിൽ നിന്ന് 25​ന് നാട്ടിലെത്തിയ എടത്വാ സ്വദേശിയായ യുവാവാണ് എടത്വായിലും പരിസര പ്രദേശങ്ങളിലും കറങ്ങി നടന്നത്. എടത്വാ സി.ഐ ദ്വിജേഷിന്റെ നിർദ്ദേശ പ്രകാരം എസ്‌​.ഐ സിസിൽ ക്രിസ്റ്റിൽ രാജ് നടത്തിയ പരിശോധനയിലാണ് ഇയാളെ കണ്ടെത്തിയത്. എടത്വാ​-തായങ്കരി റോഡിൽ ഇല്ലിമൂട് ജംഗ്ഷന് സമീപത്തുവെച്ചാണ് ഇയാളെ പൊലീസ് പിടികൂടിയത്. പിടിക്കപ്പെടുമ്പോൾ ഇയാൾ മദ്യപിച്ചിരുന്നതായും സൂചനയുണ്ട്. ഇയാളുടെ വീട്ടിൽ പ്രായമായ മാതാപിതാക്കൾ മാത്രമാണുള്ളത്. പ്രവാസിയായ ഭാര്യയും മക്കളും ഇതുവരെ നാട്ടിൽ എത്തിയിട്ടില്ല.