കായംകുളം: നിയന്ത്രണം വിട്ട കാർ മതിലിടിച്ചു ഒരാൾ മരിച്ചു. ഒപ്പമുണ്ടായിരുന്ന മൂന്ന്അദ്ധ്യാപകർക്ക് പരിക്കേറ്റു. കർഷകസംഘം ജില്ലാ കമ്മിറ്റിയംഗമായ എരുവ അർത്തിക്കുളങ്ങര ജോണിന്റെ മകൻ ജേക്കബ് ജോൺ (54) ആണ് മരിച്ചത്. കഴിഞ്ഞ ദിവസം രാത്രി ഒന്നരയോടെ ഇദ്ദേഹത്തിന്റെ വീടിനു സമീപം നിറയിൽ മുക്കിനു വടക്കുവശത്തായിരുന്നു അപകടം. അഗ്നിരക്ഷാ സേനയെത്തി കാർ വെട്ടിപ്പൊളിച്ചാണ് ഇവരെ പുറത്തിറക്കിയത്.

പുല്ലുകുളങ്ങര എൻ.ആർ.പി എം എച്ച്.എച്ച്.എസ്.എസിലെ അദ്ധ്യാപകരായ കണ്ണമ്പള്ളിഭാഗം കണ്ണമ്പള്ളിൽ വീട്ടിൽ പ്രവീൺ (45), മേനാമ്പള്ളിൽ തോട്ടത്തിൽ എ.ആർ. രാജേഷ് (46) എരുവ കിഴക്ക് കടവിൽ വീട്ടിൽ മധു (55) എന്നിവർക്കാണ് പരിക്കേറ്റത്. ഇവരെ ആലപ്പുഴ മെഡി. ആശുപത്രിയിലും പിന്നീട് പ്രവീൺ, രാജേഷ് എന്നിവരെ സ്വകാര്യ ആശുപത്രിയിലും പ്രവേശിപ്പിച്ചു. ജേക്കബ് ജോണിനെ താലൂക്ക് ആശുപത്രിയിലെത്തിച്ചപ്പോഴേക്കും മരിച്ചു. ജെമിനിയാണ് ജേക്കബ് ജോണിന്റെ ഭാര്യ: മക്കൾ മിന്ന, മന്ന.