കൊച്ചി : ഈമാസം ഒമ്പതിന് അർദ്ധരാത്രി നിലവിൽ വരുന്ന ട്രോളിംഗ് നിരോധനം നടപ്പാക്കാൻ നടപടികൾ ആരംഭിച്ചു. ജൂലായ് 31 അർദ്ധരാത്രി വരെ 52 ദിവസം നീണ്ടുനിൽക്കും. ജില്ലയിലുള്ള അന്യസംസ്ഥാന ബോട്ടുകൾ ജൂൺ ഒമ്പതിന് മുൻപായി തീരം വിട്ടുപോകണം. ഹാർബറിലെ ഡീസൽ ബങ്കറുകൾ, തീരപ്രദേശത്തെ മറ്റു ഡീസൽ ബങ്കുകൾ എന്നിവ ട്രോളിംഗ് നിരോധന കാലയളവിൽ അടച്ചിടും.

ഇൻബോർഡ് വള്ളങ്ങൾക്ക് മത്സ്യഫെഡ് ബങ്കുകളും മറ്റ് തിരഞ്ഞെടുത്ത ബങ്കുകളും മുഖേനെ ഡീസൽ ലഭ്യമാക്കും. യന്ത്രവത്കൃത ബോട്ടുകൾക്ക് ഡീസൽ നൽകില്ല. ചെറുമത്സ്യങ്ങളെ പിടിക്കുന്നതിനെതിരെ കർശന നടപടി സ്വീകരിക്കും.ട്രോളിംഗ് നിരോധന കാലത്ത് രാസവസ്തുക്കൾ കലർന്ന മത്സ്യങ്ങളുടെ വിപണനം തടയാൻ ഭക്ഷ്യസുരക്ഷാ, ഫിഷറീസ് ഉദ്യോഗസ്ഥർക്ക് നിർദ്ദേശം നൽകിയിട്ടുണ്ട്. തൊഴിൽ നഷ്ടപ്പെടുന്ന ബോട്ടുകളിലെ തൊഴിലാളികൾ, പീലിംഗ് ഷെഡ് തൊഴിലാളികൾ എന്നിവർക്ക് മുൻകാലങ്ങളിലേതുപോലെ സൗജന്യ റേഷൻ അനുവദിക്കും. ഇനിതായി മത്സ്യത്തൊഴിലാളികൾ മത്സ്യഭവൻ ഓഫീസുകളുമായി ബന്ധപ്പെടണം.

വള്ളങ്ങൾക്ക് മത്സ്യം പിടിക്കാം

ട്രോളിംഗ് നിരോധകാലത്തും യന്ത്രവത്കൃത ഇൻബോർഡ് വള്ളങ്ങൾക്ക് മത്സ്യബന്ധനത്തിന് അനുമതിയുണ്ട്. ഒരു ഇൻബോർഡ് വള്ളത്തിനൊപ്പം ഒരു ക്യാരിയർ വള്ളം മാത്രമെ അനുവദിക്കൂ. കടലിൽപോകുന്ന പരമ്പരാഗത മത്സ്യത്തൊഴിലാളികൾ ബയോമെട്രിക് തിരിച്ചറിയൽ കാർഡും സുരക്ഷാ ഉപകരണങ്ങളും കരുതണം. കാലാവസ്ഥ മുന്നറിയിപ്പുകൾ പാലിക്കണം.

കൺട്രോൾ റൂം സജ്ജം

കടലിലുണ്ടാകുന്ന അപകടങ്ങൾ നേരിടാൻ മൂന്ന് പട്രോളിംഗ് ബോട്ടുകളും വൈപ്പിൻ ഫിഷറീസ് സ്റ്റേഷനിൽ 24 മണിക്കൂറും പ്രവർത്തിക്കുന്ന കൺട്രോൾ റൂമും സജ്ജീകരിച്ചു. കോസ്റ്റ് ഗാർഡ് കപ്പലും ഹെലികോപ്ടറും രക്ഷാപ്രവർത്തനത്തിനും പട്രോളിംഗിനും മുഴുവൻ സമയവും സജ്ജമായിരിക്കും.കടലിൽ രക്ഷാപ്രവർത്തനം ആവശ്യമായിവരുന്ന സാഹചര്യത്തിൽ താഴെപറയുന്ന നമ്പറുകളിൽ ബന്ധപ്പെടാം.

ഫിഷറീസ് കൺട്രോൾ റൂം 0484 2502768, 9496007037, 9496007029.

മറൈൻ എൻഫോഴ്‌സ്‌മെന്റ് 9496007048.

കോസ്റ്റൽ പോലീസ് സ്‌റ്റേഷൻ അഴീക്കോട് 0480 2815100, ഫോർട്ട് കൊച്ചി 0484 2215006, 1093.

കോസ്റ്റ് ഗാർഡ് 0484 2218969, ടോൾ ഫ്രീ നമ്പർ 1554.

നേവി 0484 2872354, 2872353.