കൊച്ചി: നഗരത്തിലെ വെള്ളക്കെട്ട് ഒഴിവാക്കുന്നതിനായി ജില്ലാ ഭരണകൂടം നടപ്പാക്കുന്ന ഓപ്പറേഷൻ ബ്രേക്ക് ത്രൂ പദ്ധതിയിൽ കാരണകോടം തോട് നവീകരണം വെള്ളിയാഴ്ച പൂർത്തിയാകും. കലൂർ സ്റ്റേഡിയം മെട്രോ സ്‌റ്റേഷൻ മുതൽ കാരണകോടം തോട് ചിലവന്നൂർ കായലിൽ ചേരുന്നത് വരെയുള്ള അഞ്ച് കിലോമീറ്റർ നീളത്തിൽ തോട്ടിലെ ഒഴുക്ക് സുഗമമാക്കുന്നതിന് ചെളിനീക്കവും വശങ്ങൾ സുരക്ഷിതമാക്കുകയുമാണ് പ്രധാനമായി ചെയ്യുന്നത്. ബ്രേക്ക് ത്രൂ പദ്ധതിയുടെ കീഴിലെ ഒന്നാംഘട്ടത്തിൽ ഉൾപ്പെട്ട എല്ലാ പ്രവൃത്തികളും തോട്ടിൽ പൂർത്തിയായി.രണ്ടാം ഘട്ട പ്രവർത്തനങ്ങളും പൂർത്തീകരിക്കാൻ യുദ്ധകാല അടിസ്ഥാനത്തിലാണ് പ്രവർത്തനങ്ങൾ നടക്കുന്നത്. നാല് കോടിരൂപയാണ് പ്രവർത്തന ചെലവ് .വിവിധ പ്രവൃത്തികൾ പൂർത്തിയാകുമ്പോൾ കാരണകോടം തോട്ടിലെ നീരൊഴുക്ക് സുഗമമാകും. കലൂർ സ്‌റ്റേഡിയം, തമ്മനം, കതൃക്കടവ് പ്രദേശങ്ങളിലെ വെള്ളക്കെട്ടിന് പരിഹാരമാകും. ഇടമലയാർ ഇറിഗേഷൻ പ്രോജക്ടിനാണ് കാരണകോടം നവീകരണ പ്രവർത്തനങ്ങളുടെ ചുമതല. പ്രവർത്തനങ്ങളുടെ ഫലമായി തോട് ചെലവന്നൂർ കായലിൽ ചേരുന്ന ഭാഗത്തെ വീതി 7 ൽ നിന്ന് 15 മീറ്ററായി. ഇവിടെ ഒഴുക്കിന് തടസമായിരുന്ന ചെളിയും മറ്റ് അവശിഷ്ടങ്ങളും നീക്കം ചെയ്തിരുന്നു.