കൊച്ചി: സ്‌കൂളുകളിൽ ഓൺലൈൻ ക്‌ളാസുകൾ ആരംഭിച്ചതോടെ എറണാകുളം പാർലമെന്റ് മണ്ഡലത്തിൽ ഹൈബി ഈഡൻ എം.പി നടപ്പാക്കുന്ന ടാബ്‌ലെറ്റ് ചലഞ്ചിന് ആദ്യ ദിനം മികച്ച പ്രതികരണം. പെന്റാ മേനക ഓണേഴ്‌സ് വെൽഫെയർ അസോസിയേഷനുമായി സഹകരിച്ചാണ് ചലഞ്ച്.
സിനിമ താരാം ജയസൂര്യ ചലഞ്ചിലേക്ക് 11 ടാബുകൾ സ്‌പോൺസർ ചെയ്തു. കൗൺസിലർമാരായ പി.എം ഹാരിസ് മൂന്ന് ടാബും, മാലിനി മൂന്ന് ടാബും, ജോസഫ് അലക്‌സ് തന്റെ ഒരു മാസത്തെ ഓണറേറിയവും , ജില്ലാ പഞ്ചയത്ത് മെമ്പർ സോന ജയരാജ്, ടാബ് ലറ്റ് ചലഞ്ചിലേക്ക് നല്കി. നിരവധി ആളുകൾ പദ്ധതിയ്ക്ക് പിന്തുണയുമായി എത്തുന്നുണ്ടെന്ന് ഹൈബി ഈഡൻ എം.പി പറഞ്ഞു.
പുതിയതും പഴയതുമായ ടാബ്‌ലെറ്റുകൾ ശേഖരിക്കുന്നതിന് പെന്റ മേനക, ടെക്യു ഇടപ്പള്ളി, മൊബൈൽ കിംഗ് പാലാരിവട്ടം, ഫോൺ 4 എം.ജി റോഡ്, മൈ ജി ഇടപ്പള്ളി എന്നിവിടങ്ങളിൽ കളക്ഷൻ സെന്ററുകളുമുണ്ട്.
ഇന്നലെ ഫേസ് ബുക്ക് പേജിൽ ലൈവിലൂടെയാണ് ഉദ്ഘാടനം ഹൈബി ഈഡൻ എം.പി നിർവ്വഹിച്ചത്. പെന്റാ അസോസിയേഷൻ അഞ്ചു ടാബുകളും വിവിധ ഷോപ്പുകൾ ഓരോ ടാബുകളും വീതം 10 ടാബുകൾ ഉദ്ഘാടന വേളയിൽ തന്നെ ലഭിച്ചു. ശമ്പളത്തിൽ നിന്നും 10 ടാബുകൾ വാങ്ങി നല്കുമെന്ന് എം.പി അറിയിച്ചിരുന്നു.
പാർലമെന്റ് മണ്ഡലത്തിലെ സർക്കാർ സ്‌ക്കൂളുകൾക്കാണ് ടാബുകൾ കൈമാറുന്നത്. അദ്ധ്യാപകരാണ് അർഹരായ വിദ്യാർത്ഥികളെ കണ്ടെത്തുക. നേരിട്ട് ആർക്കും ടാബുകൾ വിതരണം ചെയ്യുന്നില്ലെന്നും എം.പി പറഞ്ഞു. താത്‌പര്യമുള്ളവർക്ക് വിളിക്കാം: 9447001234