കോലഞ്ചേരി: വില്ലേജ് ഓഫീസുകളിൽ തിരക്കേറുന്നത് ജീവനക്കാർക്കും ജനങ്ങൾക്കും ആശങ്ക ഉണ്ടാക്കുന്നു. നികുതിയടക്കാനും ജാതി, വരുമാനം, കൈവശാവകാശം എന്നിവയുൾപ്പെടെയുള്ള വിവിധ സർട്ടിഫിക്ക​റ്റുകൾ വാങ്ങുന്നതിനുമായി ഒരേ സമയം ഒട്ടേറെ പേർ വില്ലേജ് ഓഫീസുകളിൽ എത്തുന്നുണ്ട്. ഇതിൽ 65 വയസിനു മുകളിലുള്ളവരും എത്തുന്നുണ്ട്. വില്ലേജ് ഓഫീസുകളിൽ ജീവനക്കാരുടെ എണ്ണം പരിമിതമാണ്. അതിനാൽ എല്ലാവരും ജോലിത്തിരക്കിലുമാണ്. പ്രായമായവർ കൂടുതൽ ജാഗ്രത

പാലിക്കണമെന്ന ആരോഗ്യ വകുപ്പിന്റെ നിർദേശം പാലിക്കപ്പെടുന്നില്ല.

#നിർദേശം പാലിക്കപ്പെടുന്നില്ല

സാമൂഹിക അകലം പാലിച്ചാകണം ഓഫീസുകളിൽ നിൽക്കേണ്ടത് എന്ന നിബന്ധന പാലിക്കാൻ വിവിധ ആവശ്യങ്ങൾക്കായി വില്ലേജ് ഓഫീസിലെത്തുന്നവർ തയാറാകുന്നില്ല. ചിലരെങ്കിലും മുഖാവരണം ധരിക്കാതെയും വരുന്നുണ്ട്. ഓഫീസർമാരുടെ നിർദേശം ഉണ്ടായാൽ ടവ്വലോ മ​റ്റെന്തെങ്കിലും തുണിയോ ഉപയോഗിച്ചു മുഖം താത്കാലികമായി മറയ്ക്കുക മാത്രമാണു ചെയ്യുന്നത്. കൈ കഴുകുക, അണുനാശിനി ഉപയോഗിക്കുക എന്നിവ ചെയ്യുന്നതിനും പലരും വിമുഖത കാണിക്കുന്നുണ്ട്.