കൊച്ചി: കെ.എസ്.ആർ.ടി.സി ഡിപ്പോയിലെ വാഹനങ്ങൾ അണുവിമുക്തമാക്കുന്നതിനുള്ള സാമഗ്രികൾ കളക്ടർ എസ്. സുഹാസ് കൈമാറി. സ്വന്തംനിലയ്ക്ക് വാഹനങ്ങൾ അണുവിമുക്തമാക്കുന്നതിന് കെ.എസ്.ആർ.ടി.സിയെ പ്രാപ്തമാക്കുന്നതിന്റെ ഭാഗമായാണ് ശുചീകരണ സാമഗ്രികൾ കൈമാറിയത്. പി.പി.ഇ കിറ്റുകൾ, അണുനാശിനി, പമ്പുകൾ എന്നിവ ഇതിനായി ലഭ്യമാക്കും. റെയിൽവേ സ്റ്റേഷൻ, വിമാനത്താവളം എന്നിവിടങ്ങൾ കേന്ദ്രീകരിച്ച് സർവീസ് നടത്തുന്ന ബസുകളും മറ്റ് ബസുകളും സർവീസിന് ശേഷം അണുവിമുക്തമാക്കും. ശുചീകരണ സാമഗ്രികൾ എറണാകുളം കെ.എസ്.ആർ.ടി.സി ഡിപ്പോ ഇൻസ്‌പെക്ടർ ആന്റണി ജോസഫ് ജില്ലാ കളക്ടറിൽ നിന്ന് ഏറ്റുവാങ്ങി. റീജണൽ ട്രാൻസ്‌പോർട്ട് ഓഫീസർമാരായ കെ. മനോജ് കുമാർ, ജി. അനന്തകൃഷ്ണൻ എന്നിവർ സന്നിഹിതരായിരുന്നു.