മൂവാറ്റുപുഴ: മാറാടി ഗ്രാമപഞ്ചായത്തിലെ ശൂലം ചെക്ക് ഡാമിന്റെ ഉദ്ഘാടനം ഈ മാസം 19ന് ഉച്ചയ്ക്ക് 12ന് എൽദോ എബ്രഹാം എം.എൽ.എ നിർവഹിക്കും. പഞ്ചായത്ത് പ്രസിഡന്റ് ലത ശിവൻ അദ്ധ്യക്ഷത വഹിക്കും. ജില്ലാ പഞ്ചായത്ത് മെമ്പർ എൻ.അരുൺ മുഖ്യപ്രഭാഷണം നടത്തുമെന്ന് വാർഡ് മെമ്പർ ബിന്ദു ബേബി അറിയിച്ചു. ശൂലം പെരുന്തോടിന് കുറുകെ ചെക്ക് ഡാം വേണമെന്ന ആവശ്യത്തിന് വർഷങ്ങളുടെ പഴക്കമുണ്ട്. വേനൽ കാലത്ത് ചെക്ക് ഡാമിൽ വെള്ളം നിറച്ചിടുന്നതോടെ പെരുന്തോടിന് സമീപത്തെ കിണറുകളിലും കുളങ്ങളിലുമെല്ലാം നീരുറവയ്ക്ക് കാരണമാകും.വേനൽകാലമാകുമ്പോൾ കൊള്ളികാട്ട്‌ശേരി, പൊട്ടർകാട് പ്രദേശവാസികളുടെ കുടിവെള്ളക്ഷാമത്തിന് ഒരു പരിധിവരെ ചെക്ക് ഡാം സഹായകരമാകും.ശൂലം ചെക്ക് ഡാം ഉദ്ഘാടനം ചെയ്യുന്നതോടെ ഒരു പ്രദേശത്തിന്റെ സ്വപ്നമാണ് യാഥാർത്ഥ്യമാകുന്നതെന്ന് വാർഡ് മെമ്പർ ബിന്ദു ബേബി പറഞ്ഞു.

# ശൂലം ചെക്ക് ഡാം

മാറാടി ഗ്രാമപഞ്ചായത്ത് 13ാം വാർഡിൽ ശൂലം നീർത്തട പദ്ധതിയിൽ ഉൾപ്പെടുത്തി 34ലക്ഷം രൂപ മുടക്കിയാണ് ശൂലം പെരുന്തോടിന് കുറുകെ ശൂലം ചെക്ക് ഡാം നിർമ്മിച്ചിരിക്കുന്നത്. മഴക്കാലത്ത് ചെക്ക് ഡാമിലെ വെള്ളം തുറന്ന് വിടുന്നതിനും വേനൽകാലത്ത് ചെക്ക് ഡാമിൽ വെള്ളം സംഭരിക്കുന്നതിനും ഷട്ടറുകളും വാൽവും സജ്ജീകരിച്ചിട്ടുണ്ട്.