മൂവാറ്റുപുഴ: മാറാടി ഗ്രാമപഞ്ചായത്ത് മൂന്നാം വാർഡിലെ കരോട്ട്കുന്നേൽ ഭാഗത്ത് നിർമിച്ച പഞ്ചായത്ത് ഓഫീസ് മിനി കുടിവെള്ള പദ്ധതി യാഥാർത്ഥ്യമായി. ഉദ്ഘാടനം 19ന് രാവിലെ 11ന് എൽദോ എബ്രഹാം എം.എൽ.എ നിർവഹിക്കും. പഞ്ചായത്ത് പ്രസിഡന്റ് ലത ശിവൻ അദ്ധ്യക്ഷത വഹിക്കും. ജില്ലാ പഞ്ചായത്ത് മെമ്പർ എൻ. അരുൺ മുഖ്യപ്രഭാഷണം നടത്തും.

പഞ്ചായത്തിൽ നിന്നനുവദിച്ച 10 ലക്ഷം രൂപ മുതൽ മുടക്കിയാണ് കുടിവെള്ള പദ്ധതിയുടെ നിർമ്മാണം പൂർത്തിയാക്കിയത്. മണ്ണത്തൂർ കവലയിലുള്ള പഞ്ചായത്ത് കിണറിൽ നിന്ന് വെള്ളം പമ്പുചെയ്ത് പഞ്ചായത്ത് ഓഫീസിന് സമീപത്തുള്ള ഉയർന്ന പ്രദേശത്ത് സ്ഥാപിച്ച ടാങ്കിൽ വെള്ളമെത്തിച്ച് വിതരണം ചെയ്യുന്നതാണ് പദ്ധതി. 25 കുടുംബങ്ങൾക്കും പഞ്ചായത്ത് ഓഫീസ് അടക്കമുള്ള ഓഫീസിലേയ്ക്കും സുഗമമായി കുടിവെള്ളമെത്തിക്കുന്നതിനും പദ്ധതി ലക്ഷ്യമിടുന്നു. നിലവിൽ പ്രദേശത്ത് വാട്ടർ അതോറിറ്റിയുടെ കുടിവെള്ളമാണ് ഉപയോഗിക്കുന്നത്. ഇത് സുഗമമായി ലഭിക്കാറില്ല. പദ്ധതി യാഥാർത്ഥ്യമായതോടെ പ്രദേശത്ത് അടിക്കടി കുടിവെള്ളം മുടങ്ങുന്ന അവസ്ഥയ്ക്ക് പരിഹാരമാകുമെന്ന് വാർഡ് മെമ്പർ കെ.എസ്.മുരളി പറഞ്ഞു.