• സംസ്ഥാന ബാംബൂ കോർപറേഷന്റെ പുതിയ ഉല്പന്നങ്ങൾ വിപണിയിൽ

കൊച്ചി: സംസ്ഥാന ബാംബൂ കോർപറേഷൻ ഈറ്റയിലും മുളയിലും നിർമിച്ച ഓഫീസ് സ്‌റ്റേഷനറി ഉത്പന്നങ്ങളുടെ വിതരണോദ്ഘാടനം വ്യവസായ മന്ത്രി ഇ. പി. ജയരാജൻ നിർവഹിച്ചു. ഹരിത കേരളം മിഷൻ ഉപാധ്യക്ഷ ഡോ. ടി. എൻ. സീമ ഏറ്റുവാങ്ങി.

ഫയൽപാഡ്, ഫയൽട്രേ, പെൻസ്റ്റാൻഡ്, വേസ്റ്റ്ബിൻ തുടങ്ങിയവ ഉല്പന്ന നിരയിലുണ്ട്. സർക്കാർ ഓഫീസുകളിൽ ഈ ഉത്പന്നങ്ങൾ ഉപയോഗിക്കുന്നത് ഈറ്റ മേഖലയ്ക്ക് മുതൽക്കൂട്ടാവുമെന്ന് മന്ത്രി പറഞ്ഞു.
500 പേർക്ക് തൊഴിലും കോർപറേഷന് 1.50 കോടി രൂപ വാർഷിക വരുമാനവും ലഭിക്കും. മാസം 500 കോംബോ പാക്കറ്റുകളാണ് ഉത്പാദിപ്പിക്കുക. 1500 ഏക്കർ സ്ഥലത്ത് മുള വച്ചുപിടിപ്പിക്കാൻ ബാംബൂ കോർപറേഷൻ തീരുമാനിച്ചിട്ടുണ്ട്. ആറളത്ത് പദ്ധതിക്ക് തുടക്കമായതായി മന്ത്രി അറിയിച്ചു.

ഡൽഹിയിലെ സംസ്ഥാന സർക്കാരിന്റെ പ്രത്യേക പ്രതിനിധി ഡോ. എ. സമ്പത്ത്, വ്യവസായ വകുപ്പ് പ്രിൻസിപ്പൽ സെക്രട്ടറി ഇളങ്കോവൻ, ബാംബൂ കോർപറേഷൻ ചെയർമാൻ കെ. ജെ. ജേക്കബ് എന്നിവർ സംബന്ധിച്ചു.