കൊച്ചി: എല്ലാ രംഗങ്ങളിലും ഇന്ത്യ ചൈനയെ മറികടക്കുമെന്ന് ഡോ. സുബ്രഹ്മണ്യം സ്വാമി എം.പി പറഞ്ഞു. കൊവിഡിനെയും ചൈനീസ് ആക്രമണത്തേയും ഇന്ത്യ അതിജീവിക്കും. ഇന്ത്യൻ പട്ടാളക്കാർ ധൈര്യശാലികളുടെ കൂട്ടമാണെന്നും അദ്ദേഹം പറഞ്ഞു.

കേരള മാനേജ്‌മെന്റ് അസോസിയേഷൻ സംഘടിപ്പിച്ച വിർച്വൽ യോഗത്തിൽ സംസാരിക്കുകയായിരുന്നു അദ്ദേഹം.

കോവിഡും ചൈനീസ് നീക്കങ്ങളും ഇന്ത്യൻ സാമ്പത്തിക രംഗത്തെ എങ്ങനെ സ്വാധീനിക്കും എന്നതായിരുന്നു പ്രഭാഷണ വിഷയം.
1965 ലും 1991 ലും ഇന്ത്യ തകരുമെന്ന് പലരും പറഞ്ഞിരുന്നു. മികച്ച നിലയിലേക്ക് ഇന്ത്യ വളരുകയാണ് ചെയ്തത്. ശക്തമായ കഴിവുകളുള്ള രാജ്യമാണ് ഇന്ത്യ. ആദ്യകാലത്ത് ആവശ്യത്തിന് ഉത്പാദനമില്ലായ്മയാണ് ഇന്ത്യയെ വലച്ചിരുന്നത്.

ആസൂത്രിതമായ പദ്ധതികളിലൂടെ പത്തു വർഷം കൊണ്ട് കാർഷികോത്പാദന രാജ്യമായി മാറാൻ ഇന്ത്യയ്ക്ക് സാധിച്ചു. ചൈനയുടെ നീക്കങ്ങൾക്ക് അന്താരാഷ്ട്ര പിന്തുണ ലഭിക്കുമെന്ന് പ്രതീക്ഷിക്കുന്നില്ല
കൊവിഡിന്റെ ആക്രമണം ഉണ്ടായില്ലെങ്കിലും ഇന്ത്യൻ സാമ്പത്തികരംഗം താഴേക്ക് പോകുമായിരുന്നു. അടുത്ത വർഷം കാര്യങ്ങൾ തിരികെ പിടിക്കാൻ സാധിച്ചേക്കുമെന്നും സുബ്രഹ്മണ്യം സ്വാമി പറഞ്ഞു.
കേരള മാനേജ്‌മെന്റ് അസോസിയേഷൻ പ്രസിഡന്റ് ജിബു പോൾ, പ്രോഗ്രാം കമ്മിറ്റി ചെയർമാൻ എസ്. രാജ്‌മോഹൻ നായർ, സീനിയർ വൈസ് പ്രസിഡന്റ് ആർ. മാധവ് ചന്ദ്രൻ, സെക്രട്ടറി ബിബു പുന്നൂരാൻ എന്നിവർ സംസാരിച്ചു.