കൊച്ചി: സംസ്ഥാന സർക്കാരിന്റെ സുഭിക്ഷകേരളം പദ്ധതിയുമായി സഹകരിച്ച് എറണാകുളം അങ്കമാലി അതിരൂപതയുടെ നേതൃത്വത്തിൽ സാമൂഹ്യ പ്രവർത്തന വിഭാഗമായ സഹൃദയയും തൃക്കാക്കര സേക്രഡ് ഹാർട്ട് മൈനർ സെമിനാരിയും ചേർന്ന് എട്ടര ഏക്കറോളം തരിശുഭൂമി കൃഷിയോഗ്യമാക്കി. അതിരൂപതയുടെ ഹരിതസമൃദ്ധി പദ്ധതിയുടെ ഭാഗമായി ആരംഭിക്കുന്ന മാതൃകാ കൃഷിത്തോട്ടത്തിന്റെ ഉദ്ഘാടനം അഡ്വ.പി.ടി.തോമസ് എം.എൽ.എ നിർവഹിച്ചു. തൃക്കാക്കര സെമിനാരിയിൽ ചേർന്ന ചടങ്ങിൽ കളമശേരി ബ്ലോക്ക് കൃഷി അസിസ്റ്റന്റ് ഡയറക്ടർ ബെൻസി എബ്രഹാം അദ്ധ്യക്ഷയായി. സെമിനാരി റെക്ടർ ഫാ.ആന്റണി നരികുളം, സഹൃദയ എക്‌സിക്യൂട്ടീവ് ഡയറക്ടർ ഫാ.ജോസഫ് കൊളുത്തുവെള്ളിൽ, തൃക്കാക്കര കൃഷി ഓഫീസർ പി. അനിത, നഗരസഭാ കൗൺസിലർമാരായ മേരി കുര്യൻ, ഷബ്‌ന മെഗ് റലി , യൂസഫ്, നിഷാദ് എന്നിവർ സംസാരിച്ചു.