ആലുവ: ചികിത്സാ സഹായത്തിനായി ബിരിയാണി ചലഞ്ചിനിടെ പാചകക്കാരനായ ബന്ധു കുഴഞ്ഞുവീണ് മരിച്ചു. ആലുവ മുപ്പത്തടം എരമം പടുവത്തിൽ കൊച്ചു ഖാദറിന്റെ മകൻ അഷറഫ് (56) ആണ് മരിച്ചത്.

ഇന്നലെ ഉച്ചയോടെയാണ് സംഭവം. ആലുവയിലെ സ്വകാര്യാശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.

ഒരു മാസം മുമ്പുണ്ടായ ബൈക്കപകടത്തിൽപ്പെട്ട ഏലൂക്കര സ്വദേശി ഷെമീറിനും ഒമ്പത് വയസുള്ള മകനും ചികിത്സയ്ക്കായി പണം കണ്ടെത്താൻ ഇന്നലെ ബിരിയാണി ചലഞ്ച് നടത്താൻ നാട്ടുകാർ തീരുമാനിച്ചിരുന്നു. പരിക്കേറ്റവരുടെ ബന്ധുകൂടിയായ അഷറഫാണ് പാചക ചുമതല ഏറ്റെടുത്തത്.

സി.പി.ഐ നേതാവ് ടി.എ ഇസ്മായിൽ കൺവീനറായി രൂപീകരിച്ച ചികിത്സാ സഹായ സമിതിയാണ് മൂവായിരം ബിരിയാണിയുണ്ടാക്കി 100 രൂപ വിലയ്ക്ക് വിറ്റ് ധനസമാഹരണം നടത്താൻ തീരുമാനിച്ചത്. ഈ നിർദ്ദേശം വന്നപ്പോൾ കാറ്ററിംഗ് സർവ്വീസ് നടത്തുന്ന അഷറഫ് ബിരിയാണിയുടെ പാചകം സ്വയം ഏറ്റെടുക്കുകയായിരുന്നു.

പായ്ക്ക് ചെയ്യുമ്പോഴാണ് അഷറഫ് കുഴഞ്ഞു വീണത്.
ഭാര്യ: നസീമ. മക്കൾ: ഉമർ മുക്താർ, അൻസിയ, അബീഷ. മരുമക്കൾ: ഷിനാസ്, ജബ്ബാർ.