# മൂവാറ്റുപുഴ വി​ജി​ലൻസ് കോടതിയിൽ സംഘർഷാവസ്ഥ

തൃക്കാക്കര : പ്രളയഫണ്ട് തട്ടിപ്പുകേസിൽ ഒളിവിലായിരുന്ന മൂന്നാംപ്രതി​ സി.പി.എം മുൻ ലോക്കൽ കമ്മിറ്റി അംഗം എം.എം. അൻവർ അന്വേഷണസംഘം മുമ്പാകെ കീഴടങ്ങി. ഇന്നലെ ഉച്ചയോടെയാണ് ഇയാൾ എറണാകുളം ക്രൈംബ്രാഞ്ച് ഓഫീസിലെത്തിയത്. മൂന്ന് മാസത്തിലേറെയായി ഒളി​വിലായിരുന്നു.

രണ്ടുതവണ ഹൈക്കോടതി അൻവറിന്റെ മുൻകൂർ ജാമ്യഹർജി തള്ളിയതാണ്. അന്വേഷണ ഉദ്യോഗസ്ഥന് മുന്നിൽ ഹാജരാകാനായിരുന്നു നിർദേശം. പ്രതിയെ മൂവാറ്റുപുഴ വിജിലൻസ് കോടതിയിൽ ഹാജരാക്കി മൂന്നുദിവസത്തേക്ക് കസ്റ്റഡിയിൽ വാങ്ങി.

യൂത്ത് കോൺഗ്രസ് പ്രവർത്തകരുടെ നേതൃത്വത്തിൽ കോടതി പരിസരത്തുണ്ടായ പ്രതിഷേധം സംഘർഷത്തിൽ കലാശിച്ചു. കോടതി നടപടികൾക്ക് ശേഷവും പൊലീസിന് അൻവറുമായി ഏറെനേരം പുറത്തിറങ്ങാനായില്ല.
പ്രളയ ദുരി​താശ്വാസമായി​ ഗുണഭോക്താക്കൾക്ക് നൽകേണ്ട 10,54,000 രൂപ സി.പി.എം ഈസ്റ്റ് ലോക്കൽ കമ്മിറ്റി അംഗമായി​രുന്ന എം.എം. അൻവറിന്റെ അയ്യനാട് സർവീസ് സഹകരണ ബാങ്ക് അക്കൗണ്ട് വഴി തട്ടാൻ ശ്രമിച്ച കേസിലാണ് നടപടി. ബാങ്കി​ന്റെ ഡയറക്ടർ ബോർഡ് അംഗം കൂടി​യായി​രുന്നു അൻവറി​ന്റെ ഭാര്യയും കേസിലെ പ്രതി​യുമായ കൗലത്ത്.

നാശമുണ്ടായ വീടുകൾക്ക് 10,000, 60,000, 1,25,000 , 2,50,000 രൂപ ക്രമത്തിൽ സ്ളാബ് തിരിച്ചാണ് നഷ്ടപരിഹാരം സർക്കാർ നൽകിയത്. വീട് പൂർണമായി നഷ്ടമായവർക്ക് പരമാവധി നാലുലക്ഷം രൂപ വരെയും നൽകിയിരുന്നു. ഈ മാനദണ്ഡങ്ങൾ ലംഘിച്ച് പ്രളയത്തിൽ നാശനഷ്ടം സംഭവിക്കാത്ത അൻവറിന്റെ അക്കൗണ്ടിലേക്ക് അഞ്ചുതവണകളായി തുകയെത്തി​.

ബാങ്ക് മാനേജർക്ക് സംശയം തോന്നി​യതി​നെത്തുടർന്ന് രണ്ടാമതെത്തി​യ പണം പിൻവലിക്കാൻ അനുവദിച്ചില്ല. ബാങ്ക് പ്രസിഡന്റ് അഡ്വ. ജയചന്ദ്രൻ ജില്ലാ കളക്ടറെ ഇക്കാര്യം അറിയിച്ചതോടെയാണ് വെട്ടിപ്പ് പുറംലോകം അറിഞ്ഞത്. കേസി​ലെ രണ്ടാംപ്രതിയായ​ മഹേഷി​ന്റെ ഭാര്യയും അഞ്ചാംപ്രതി​യുമായ നീതു ഒളി​വി​ലാണ്. ഇവർ മാത്രമാണ് ഇനി​ അറസ്റ്റി​ലാകാനുള്ളത്.

# കൗലത്ത് അൻവറിന്റെ ജാമ്യം റദ്ദാക്കാൻ

പൊലീസ് സുപ്രീംകോടതിയി​ലേക്ക്

പ്രളയഫണ്ട് തട്ടിപ്പുകേസിൽ നാലാംപ്രതിയും അയ്യനാട്‌ സഹകരണബാങ്ക് ഡയറക്ടർ ബോർഡ് മെമ്പറുമായിരുന്ന കൗലത്ത് അൻവറിന്റെ ജാമ്യം റദ്ദാക്കാൻ സുപ്രീംകോടതിയെ സമീപിക്കുമെന്ന് കൊച്ചി​ സി​റ്റി​ പൊലീസ് കമ്മി​ഷണർ വിജയ് സാഖറെ പറഞ്ഞു. അൻവറിന്റെ ഭാര്യ കൗലത്താണ് ബാങ്കിൽ നിന്നും പണം പിൻവലിക്കാൻ സഹായിച്ചതെന്ന് കണ്ടെത്തിയ സാഹചര്യത്തിലാണിത്.

കേസിലെ ഒന്നാംപ്രതി വിഷ്ണുപ്രസാദിന്റെ ജാമ്യാപേക്ഷയിൽ ഇന്ന് വിധിപറയും. കളക്ടറേറ്റി​ലെ പരി​ഹാരം സെക്ഷനി​ൽ ക്ളാർക്കായി​രുന്ന വി​ഷ്ണുവി​ന്റെ നേതൃത്വത്തി​ൽ പ്രളയദുരി​താശ്വാസ ഫണ്ടി​ൽനി​ന്ന് ഒന്നരക്കോടി​യോളം രൂപ തട്ടി​ച്ചതായി​ കണ്ടെത്തി​യി​ട്ടുണ്ട്.