കൊച്ചി: വെന്റിലേറ്ററിൽ കഴിഞ്ഞ കുഞ്ഞിനെ ആറു ദിവസത്തിന് ശേഷം കൈയിൽ വാങ്ങി പാലൂട്ടുമ്പോൾ നേപ്പാളി യുവതി സഞ്ജാ മയയുടെ കണ്ണുകൾ നിറഞ്ഞൊഴുകി. പി​താവി​ന്റെ അക്രമത്തി​ൽ പാതിജീവൻ പോലുമില്ലാതെ ആശുപത്രിയിലെത്തിച്ച മകളെ വ്യാഴാഴ്ചയാണ് ഒടുവി​ൽ കണ്ടത്.

ഉറ്റവരും ഉടയവരുമില്ലാതെ ഭാഷ പോലും അറിയാത്ത നാട്ടിൽ ഉടുതുണിക്ക് മറുതുണിയില്ലാത്ത നിസഹായാവസ്ഥയിലാണ് യുവതി​. 58 ദിവസം മാത്രം പ്രായമുള്ള പിഞ്ചോമനയുടെ ജീവനായി പ്രാർത്ഥനയോടെ കോലഞ്ചേരി​ മെഡി​ക്കൽ കോളേജ് ആശുപത്രി​യി​ലെ ന്യൂറോ ഐ.സി​.യുവി​ന് മുന്നി​ൽ കാത്തിരിക്കുകയാണ് സഞ്ജാ മയ.

ഒരു വർഷമായി അനുഭവിച്ചു തീർത്ത വേദനകൾ മാസ്കണി​ഞ്ഞി​ട്ടും ആ മുഖത്തും കണ്ണുകളി​ലും വായിക്കാം. വി​വാഹത്തി​ന്റെ പുതുമോടി​ മാറി​യി​ട്ടി​ല്ലെങ്കി​ലും ഒരു മനുഷ്യായുസി​നുള്ളി​ൽ അനുഭവി​ക്കേണ്ട ദുഃഖവും ദുരി​തവും ഈ പെൺ​കുട്ടി​ നേരി​ട്ടുകഴി​ഞ്ഞു.

മകളുടെ ജീവനെടുക്കാൻ ശ്രമിച്ച ഭർത്താവ് ഷൈജു തോമസ് ജയിലിലായതോടെ ഭർതൃവീട്ടുകാർ കൈയൊഴിഞ്ഞ സ്ഥി​തി​യാണ്. ബന്ധുക്കൾക്ക് കേരളത്തിലേക്ക് എത്താൻ മാർഗമില്ല. ആശുപത്രി അധികൃതരുടെ കനിവാൽ കിട്ടിയ ഭക്ഷണവും വസ്ത്രവും പരി​ഗണനയും താങ്ങാകുന്നു. ഭർത്താവ് ഏൽപ്പിച്ച വേദനകൾ ശരീരത്തി​​ലും മനസി​ലും വി​ങ്ങുകയാണ്.

ഗർഭിണിയാണെന്ന് അറിഞ്ഞന്നു മുതൽ തുടങ്ങിയതാണ് ഷൈജുവിന്റെ ഉപദ്രവം. അടിവയറ്റിൽ തൊഴിച്ച് കുഞ്ഞിനെ കൊല്ലാൻ പലവട്ടം ശ്രമിച്ചു. കുഞ്ഞ് തന്റേതല്ലെന്ന പേരിലായിരുന്നു ശല്യം തുടങ്ങിയത്. പ്രസവശേഷം പെൺകുഞ്ഞെന്ന് പറഞ്ഞായി​. കുഞ്ഞിനെ വലിച്ചെറിഞ്ഞ ദിവസവും പെൺകുഞ്ഞായതിനാൽ അടിച്ച് വളർത്തണമെന്ന് പറ‌ഞ്ഞായിരുന്നു മർദ്ദനം. മുലയൂട്ടുന്നതി​നി​ടെയും അടിച്ചിരുന്നു. കുഞ്ഞ് കരഞ്ഞാൽ തനി​ക്കും കി​ട്ടും തല്ല്. അടിയേറ്റ് സുഖമി​ല്ലാതായ കുഞ്ഞി​നെ ആശുപത്രിയിൽ കൊണ്ടുപോകണമെന്ന് പറഞ്ഞിട്ടും കേട്ടില്ല.

കുഞ്ഞിന് ഭേദമായാൽ സ്വന്തം നാട്ടിലേക്ക് പോകാനാണ് ആഗ്രഹം. ഫേസ് ബുക്കിലൂടെയാണ് ഇരുവരും പരിചയപ്പെട്ടത്. സഞ്ജാ മയയുടെ അച്ഛനും ഷൈജുവിന്റെ സഹോദരനും പാസ്റ്ററാണ്. ഒരു വർഷം മുമ്പ് നേപ്പാളിൽ വച്ചായിരുന്നു ഇരുവരുടെയും വിവാഹം. തുടർന്ന് അങ്കമാലിയിലായിരുന്നു ഷൈജുവി​ന്റെ അമ്മയ്ക്കും പെങ്ങൾക്കുമൊപ്പം വാടകയ്ക്ക് താമസം. ഫുഡ് ഡെലി​വറി​ ജോലി​യാണ് ഷൈജു ചെയ്തി​രുന്നത്.