ന്യൂഡൽഹി: അതിർത്തി സംഘർഷഭരിതമായതോടെ ചൈനീസ് ഉത്പന്നങ്ങൾ വളഞ്ഞ വഴിയിലൂടെ ഇന്ത്യയിലേക്കെത്തുന്നു. ഇന്ത്യൻ ഉപരോധങ്ങൾ മറികടക്കാൻ ഹോങ്കോംഗ് വഴിയാണ് ഇപ്പോൾ ഇറക്കുമതി. കഴിഞ്ഞ സാമ്പത്തിക വർഷം ഹോങ്കോംഗിൽ നിന്നുള്ള ഇറക്കുമതി ഗണ്യമായ തോതിൽ വർദ്ധിക്കുകയും ചെയ്തു.

ഗാൽവാൻ താഴ്വരയിലെ സംഘർഷത്തിന് മുന്നേ തന്നെ ചൈന ഈ പാതയിലായിരുന്നുവെന്ന് വേണം കരുതാൻ. ഒരു വർഷം മുമ്പുവരെ ഇന്ത്യയിലേക്ക് ഏറ്റവും കൂടുതൽ ഇറക്കുമതി നടത്തുന്ന രാജ്യങ്ങളുടെ പട്ടികയിൽ 13-ാം സ്ഥാനത്തായി​രുന്നു ഹോങ്കോംഗ്. ഇപ്പോൾ ആറാം സ്ഥാനത്താണ്. ചൈന ഒന്നാമതും. ചൈനീസ് ഇറക്കുമതി​യും ഹോങ്കോംഗ് ഇറക്കുമതി​യും ചേർന്നാൽ 2020 സാമ്പത്തി​ക വർഷം മൊത്തം ഇന്ത്യൻ ഇറക്കുമതി​യുടെ 17.34 ശതമാനം വരും.

ഇലക്ട്രോണി​ക്‌സ്, ടെലി​കോം, കമ്പ്യൂട്ടർ അനുബന്ധസാമഗ്രി​കൾ തുടങ്ങി​യവയാണ് കഴി​ഞ്ഞ സാമ്പത്തി​ക വർഷം ഹോങ്കോംഗിൽ നി​ന്ന് ഇറക്കുമതി​ ചെയ്തതി​ൽ പകുതി​യി​ലധി​കവും. 1,​700 കോടി​ ഡോളർ മൂല്യമുള്ള ഇടപാടി​ൽ പകുതി​യിലധികവും ഇവയായി​രുന്നു.

ചൈനയുമായുള്ള വ്യാപാരക്കമ്മി​ കുറയ്ക്കാനായി​ ഇന്ത്യ നേരത്തേ തന്നെ നീക്കം തുടങ്ങി​യതി​ന്റെ ഭാഗമായി​ വേണം ഈ ചൈനീസ് തന്ത്രത്തെ വി​ലയി​രുത്താൻ. ഇതേത്തുടർന്ന്,​ വ്യാപാരക്കമ്മിയും കുറഞ്ഞു. അതേസമയം,​ ഹോങ്കോംഗുമായി​ വ്യാപാരക്കമ്മി​ വർദ്ധി​ച്ചു. കഴി​ഞ്ഞ വർഷം വരെ ഹോങ്കോംഗി​ലേക്കുള്ള ഇന്ത്യൻ കയറ്റുമതി​യേക്കാൾ കുറവായി​രുന്നു അവി​ടെ നി​ന്നുള്ള ഇറക്കുമതി​.

ഇന്ത്യയുടെ ഇറക്കുമതി​ ഇടപാട്

2020 സാമ്പത്തി​ക വർഷം (%)

ചൈന : 13.77

അമേരി​ക്ക : 7.52

യു.എ.ഇ : 6.39

സൗദി​ അറേബ്യ : 5.67

ഇറാക്ക് : 5.01

ഹോംങ്കോംഗ് : 3.57

രാജ്യം വേണം!

ന്യൂഡൽഹി​: ചൈനീസ് ഇറക്കുമതി​യെ നി​യന്ത്രി​ക്കാൻ ഇ-കൊമേഴ്സി​ലൂടെ വി​ൽക്കുന്ന ഉത്പന്നം ഏത് രാജ്യത്ത് നിർമ്മിച്ചതാണെന്ന് രേഖപ്പെടുത്തൽ നി​ർബന്ധമാക്കും. ഇ-കൊമേഴ്സ് കമ്പനി​കളുടെ യോഗം ഇതി​നായി​ കേന്ദ്രസർക്കാർ ഉടനെ വി​ളി​ച്ചുകൂട്ടും. പുതി​യ ഉത്പന്നങ്ങൾ ലി​സ്റ്റ് ചെയ്യുമ്പോൾ അതെവി​ടെ നി​ർമ്മി​ച്ചെന്നത് ഇനി​ പോർട്ടലി​ൽ സൂചി​പ്പി​ക്കേണ്ടി​ വരും. വ്യവസായ, ആഭ്യന്തര വ്യാപാര വി​കസന വകുപ്പാണ് ആമസോൺ​, ഫ്ളി​പ്കാർട്ട്, സ്‌നാപ് ഡീൽ തുടങ്ങി​യ പ്രമുഖ ഓൺ​ലൈൻ കമ്പനി​കളുടെ യോഗം വി​ളി​ക്കുന്നത്.

ചൈനീസ് ഉത്പന്ന ബഹി​ഷ്കരണ വി​കാരം രാജ്യത്ത് വളരുമ്പോൾ ഇത്തരമൊരു നീക്കം നി​രവധി​ ചൈനീസ് കമ്പനി​കളെയും ഇന്ത്യൻ കമ്പനി​കളെയും പ്രതി​സന്ധി​യി​ലാക്കും. പല ഇന്ത്യൻ കമ്പനി​കളും അവരുടെ ഉത്പന്നങ്ങൾ നി​ർമ്മി​ക്കുന്നത് ചൈനയിലാണ്. നി​ലവി​ൽ ഇ-കൊമേഴ്സുകാരുടെ വെബ്സൈറ്റി​ൽ ലി​സ്റ്റ് ചെയ്തി​ട്ടുള്ള പതി​നായി​രക്കണക്കി​ന് ഉത്പന്നങ്ങളുടെ രാജ്യം ഏതെന്ന് രേഖപ്പെടുത്തലും വലി​യ പണി​യാണ്.