കോലഞ്ചേരി: അന്താരാഷ്ട്ര ലഹരിവിരുദ്ധ ദിനാചരണത്തിന്റെ ഭാഗമായി ജില്ലാ സ്‌പോർട്‌സ് കൗൺസിലും വിമുക്തി, ലഹരിവിമുക്തമിഷനും ചേർന്ന് നിർമ്മിച്ച ലഹരിവിരുദ്ധ ഹ്രസ്വചിത്രം ചലച്ചിത്രതാരം വിനയ് ഫോർട്ട് പ്രകാശിപ്പിച്ചു. സ്‌പോർട്‌സ് കൗൺസിൽ പ്രസിഡന്റ് അഡ്വ. പി.വി. ശ്രീനിജൻ അദ്ധ്യക്ഷനായി.
ലോക്ക്ഡൗൺ കാലത്ത് തയ്യാറാക്കിയ മൂന്ന് മിനിറ്റ് ദൈർഘ്യമുള്ള ഷോർട്ട്ഫിലിമിൽ അഖിൽ ആൻഡ്രൂസാണ് അഭിനയിച്ചിരിക്കുന്നത്. രചനയും സംവിധാനവും നിർവഹിച്ചിരിക്കുന്നത് വിമുക്തി ജില്ലാ കോ ഓർഡിനേറ്റർ കെ.എ ഫൈസലാണ്. സഹസംവിധാനം ഷെൽബിൻ ഡിഗോയും കാമറ ആദർശ് ടി.ജെയും എഡിറ്റിംഗ് കൃഷ്ണകുമാർ മാരാരും നിർവഹിക്കുന്നു. ലഹരിവിമുക്ത സന്ദേശം നൽകുന്നത് ഷൈജു ദാമോദരനാണ്.
ജില്ലാ സ്‌പോർട്‌സ് കൗൺസിൽ ഓഫീസിൽ നടന്ന ചടങ്ങിൽ ജില്ലാ ഇൻഫർമേഷൻ ഓഫീസർ നിജാസ് ജ്യൂവൽ മുഖ്യാതിഥിയായി. അസിസ്റ്റന്റ് എക്‌സൈസ് ഡിവിഷൻ ഓഫീസർ (വിമുക്തി) പി.എ. വിജയൻ ലഹരിവിരുദ്ധ സന്ദേശം നൽകി. ജില്ലാ സ്‌പോർട്‌സ് കൗൺസിൽ സെക്രട്ടറി ജെ.ആർ. രാജേഷ്, വൈസ് പ്രസിഡന്റ് ഡോ. ജെ. ജേക്കബ്, എക്‌സിക്യുട്ടീവ് കൗൺസിൽ അംഗം ഷാഹുൽ ഹമീദ് എന്നിവർ സംസാരിച്ചു.