ചേർത്തല : മോഷ്ടിച്ച ബൈക്കിൽ സഞ്ചരിച്ച് കവർച്ച നടത്തുന്നയാൾ പൊലീസിന്റെ പിടിയിലായി. എറണാകുളം പുത്തൻകുരിശ് പഞ്ചായത്ത് 16ാം വാർഡിൽ അമ്പലമേട് അമൃത കോളനിയിൽ അരുണിനെയാണ് (26) റെയിൽവേ സ്‌റ്റേഷന് സമീപം വാഹന പരിശോധനക്കിടെ സി.ഐ പി.ശ്രീകുമാർ,എസ്.ഐ ലൈസാദ് മുഹമ്മദ് എന്നിവരുടെ നേതൃത്വത്തിൽ അറസ്റ്റ് ചെയ്തത്. കഴിഞ്ഞ ഏപ്രിൽ പുല്ലേപ്പടിയിൽ നിന്ന് മോഷ്ടിച്ച ഡ്യൂക്ക് ബൈക്കിൽ സഞ്ചരിക്കുന്നതിനിടെയാണ് ഇയാൾ പിടിയിലായത്. കഞ്ചാവ് കൈവശം വച്ചതിനും ചന്ദന മോഷണക്കേസിലും ഇയാൾ പ്രതിയാണ്. കൂട്ടാളിയായ ചെങ്ങന്നൂർ സ്വദേശി സുരേഷിനെ ജീപ്പ് മോഷണ കേസിൽ കഴിഞ്ഞ ദിവസം പൊലീസ് അറസ്റ്റ് ചെയ്തിരുന്നു. ഒളിവിലുള്ള മറ്റൊരു പ്രതിക്കായി അന്വേഷണം ഊർജിതമാക്കി. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.