മറയൂർ: പരിശോധനയിൽ പിതാവ് കൊവിഡ് രോഗബാധിതനാണെന്ന് കണ്ടെത്തിയ മകൻ ആശുപത്രിയിൽ നിന്നും കടത്തികൊണ്ടു വന്ന് വീട്ടിൽ പൂട്ടിയിട്ടു.അതിർത്തി ഗ്രാമമായ തമിഴ്നാട്ടിലെ ഉദുമലൈയിലാണ് സംഭവം. ഉടുമലൈ സ്വദേശിയായ രാജശേഖർ (83) വെള്ളിയാഴ്ചയാണ് ചെന്നൈയിൽ നിന്നും എത്തിയത്. രോഗലക്ഷണങ്ങൾ കാട്ടിയ പിതാവിനെ മകൻ കോയമ്പത്തൂരിൽ സ്വകാര്യ ആശുപത്രിയിൽ ചികിൽസക്കായി എത്തിച്ചു. ഇവിടെ നടത്തിയ കൊവിഡ് പരിശോധനയിൽ ഫലം പോസിറ്റീവായി. ഇതറിഞ്ഞ മകൻ ബാലാജി അച്ഛനെ ആശുപത്രിയിൽ നിന്നും ആരും അറിയാതെ ഉദുമലൈയിലെ വീട്ടിൽഎത്തിച്ച് പൂട്ടിയിടുകയായിരുന്നു. രഹസ്യവിവരം ലഭിച്ച ഉദുമലൈ ആരോഗ്യ വകുപ്പ് ഉദ്യോഗസ്ഥർ പൊലീസിന്റെ സഹായത്തോടെ വീട്ടിൽ നിന്നും പിടികൂടി കോയമ്പത്തൂർ ആശുപത്രിയിൽ എത്തിച്ചു അടിയന്തിര ചികിൽസ നല്കി. താമസിച്ചിരുന്ന വീടുൾപ്പെടുന്ന തെരുവ് കണ്ടയ്മെന്റ് സോണാക്കി പ്രതിരോധ നടപടികൾ സ്വീകരിച്ചു.