ഇടുക്കി: കഴിഞ്ഞ മൂന്ന് ദിവസത്തിനിടെ 27 പ്രവാസികൾ കൂടി ജില്ലയിലേക്ക് മടങ്ങിയെത്തി. എട്ട് രാജ്യങ്ങളിൽ നിന്നായി 20 പുരുഷൻമാരും ഏഴ് സ്ത്രീകളുമാണ് കൊച്ചി, തിരുവനന്തപുരം, കോഴിക്കോട് എയർപോർട്ടുകൾ വഴി മടങ്ങിയെത്തിയത്. ആരോഗ്യ പരിശോധനകൾക്ക് ശേഷം 13 പേരെ വീടുകളിലും എട്ട് പേരെ പെയ്ഡ് ക്വാറന്റൈൻ സെന്ററിലും ആറ് പേരെ സർക്കാർ കൊവിഡ് കെയർ സെന്ററിലും നിരീക്ഷണത്തിലാക്കി. ദുബായിൽ നിന്ന് തിരുവനന്തപുരം എയർപോർട്ട് വഴി ആറും കൊച്ചി എയർപോർട്ട് വഴി രണ്ടും ഉൾപ്പെടെ എട്ട് പുരുഷൻമാരാണ് എത്തിയത്. ഇതിൽ ആറ് പേരെ വീടുകളിലും ഒരാളെ മുട്ടത്തെ പെയ്ഡ് ക്വാറന്റൈൻ സെന്ററിലും ഒരാളെ പെരുമ്പള്ളിച്ചിറയിലെ സർക്കാർ കൊവിഡ് കെയർ സെന്ററിലും നിരീക്ഷണത്തിലാക്കി. തിരുവനന്തപുരത്തെത്തിയവരെ കോട്ടയം വരെ കെ.എസ്.ആർ.ടി.സി ബസിലും തുടർന്ന് ടാക്‌സിയിലുമാണ് നിരീക്ഷണ സ്ഥലത്തെത്തിച്ചത്. കൊച്ചിയിലെത്തിയവരെ ടാക്‌സിയിൽ നേരിട്ട് നിരീക്ഷണ കേന്ദ്രത്തിലെത്തിക്കുകയായിരുന്നു. ഷാർജയിൽ നിന്ന് കോഴിക്കോട് എയർപോർട്ട് വഴി രണ്ട് പുരുഷൻമാരും ഒരു സ്ത്രീയുമുൾപ്പെടെ മൂന്ന് പേരാണെത്തിയത്. എയർപോർട്ടിൽ നിന്ന് ടാക്‌സി ഉപയോഗിച്ച് മൂവരെയും കട്ടപ്പന, സൂര്യനെല്ലി, മണക്കാട് എന്നിവിടങ്ങളിലെ പെയ്ഡ് ക്വാറന്റൈൻ സെന്ററുകളിൽ നിരീക്ഷണത്തിലാക്കി. കുവൈറ്റിൽ നിന്ന് രണ്ട് പുരുഷൻമാരും രണ്ട് സ്ത്രീകളുമടക്കം നാല് പേരാണെത്തിയത്. ഒരാളെ മണക്കാട് പെയ്ഡ് ക്വാറന്റൈൻ സെന്ററിലും മൂന്ന് പേരെ വീടുകളിലും നിരീക്ഷണത്തിലാക്കി. സൗദി അറേബ്യയിൽ നിന്ന് ഒരു പുരുഷനും രണ്ട് സ്ത്രീകളുമടക്കം മൂന്ന് പേരാണെത്തിയത്. ഇതിൽ ഒരാളെ മുട്ടത്തെ പെയ്ഡ് ക്വാറന്റൈൻ സെന്ററിലും രണ്ട് പേരെ തടിയമ്പാട്, പെരുമ്പള്ളിച്ചിറ എന്നിവിടങ്ങളിലെ സർക്കാർ കൊവിഡ് കെയർ സെന്ററിലും നിരീക്ഷണത്തിൽ പാർപ്പിച്ചു. നൈജീരിയിൽ നിന്നുമെത്തിയ പുരുഷനെ തൊടുപുഴയിലെ പെയ്ഡ് ക്വാറന്റൈൻ സെന്ററിൽ നിരീക്ഷണത്തിലാക്കി. ഒമാനിൽ നിന്ന് രണ്ട് പുരുഷൻമാരാണെത്തിയത്. ഇതിൽ ഒരാളെ വീട്ടിലും അടുത്തയാളെ പെരുമ്പള്ളിച്ചിറയിലെ സർക്കാർ കൊവിഡ് കെയർ സെന്ററിലും നിരീക്ഷണത്തിൽ പാർപ്പിച്ചു. ഖത്തറിൽ നിന്ന് രണ്ടു പുരുഷന്മാരാണെത്തിയത്. ഇവരെ വീടുകളിൽ നിരീക്ഷണത്തിലാക്കി. മസ്‌ക്കറ്റിൽ നിന്നും രണ്ട് പുരുഷൻമാരും രണ്ട് സ്ത്രീകളുമുൾപ്പെടെ നാല് പേരാണെത്തിയത്. ഇവരിൽ രണ്ട് പേരെ പെരുമ്പള്ളിച്ചിറയിലെ സർക്കാർ കോവിഡ് കെയർ സെന്ററിലും ഒരാളെ നെടുങ്കണ്ടത്തെ പെയ്ഡ് ക്വാറന്റൈൻ സെന്ററിലും ഒരാളെ വീട്ടിലും നിരീക്ഷണത്തിലാക്കി

എണ്ണം താലൂക്ക് അടിസ്ഥാനത്തിൽ

തൊടുപുഴ- 15

ദേവികുളം- 1

ഇടുക്കി- 3

ഉടുമ്പൻചോല- 6

പീരുമേട്- 2

.