തൊടുപുഴ: മലയോര കർഷകരുടെ ജീവനും സ്വത്തിനും ഭീഷണിയായ വന്യമൃഗ ആക്രമണത്തിനെതിരെ അടിയന്തര നടപടി സ്വീകരിക്കണമെന്ന് ആവശ്യപ്പെട്ട് ജനാധിപത്യ കേരള യൂത്ത് ഫ്രണ്ടിന്റെ നേതൃത്വത്തിൽ തൊടുപുഴ വെങ്ങല്ലൂർ ബൈപ്പാസ് പ്രവർത്തകർ ഉപരോധിച്ചു. 15 മിനിറ്റോളം നഗരം സ്തംഭിച്ചു. തുടർന്ന് തൊടുപുഴ സി.ഐയുടെ നേതൃത്വത്തിൽ പൊലീസ് എത്തി സംസ്ഥാന പ്രസിഡന്റ് ഗീവർ പുതുപ്പറമ്പിൽ, വൈസ് പ്രസിഡന്റ് മിഥുൻ സാഗർ ഉൾപ്പെടെയുള്ളവരെ അറസ്റ്റ് ചെയ്ത് നീക്കി. കോതമംഗലത്തും മൂന്നാറിലും മറയൂരിലും വന്യമൃഗങ്ങളുടെ ആക്രമണം മൂലം കാർഷിക ഉത്പന്നങ്ങൾ നശിക്കുന്നതിൽ പ്രതിഷേധിച്ചായിരുന്നു സമരം. പരാതി പ്രളയമുണ്ടായിട്ടും പ്രശ്‌നപരിഹാരം സാധ്യമാകാത്ത സാഹചര്യത്തിലാണ് ജനാധിപത്യ കേരള യൂത്ത് ഫ്രണ്ട് പ്രക്ഷോഭ രംഗത്തിറങ്ങിയതെന്ന് സംസ്ഥാന പ്രസിഡന്റ് ഗീവർ പുതുപ്പറമ്പിൽ പറഞ്ഞു. തൊടുപുഴ വെങ്ങല്ലൂർ ബൈപ്പാസിൽ നടന്ന ഉപരോധ പരിപാടി ഉദ്ഘാടനം ചെയ്യുകയായിരുന്നു അദ്ദേഹം. ജനാധിപത്യ കേരള യൂത്ത് ഫ്രണ്ട് സംസ്ഥാന വൈസ് പ്രസിഡന്റ് മിഥുൻ സാഗർ അദ്ധ്യക്ഷത വഹിച്ചു.