ചെറുതോണി: പെൺകുട്ടികളുടെ നഗ്ന ചിത്രങ്ങളും വീഡിയോകളും പ്രചരിപ്പിച്ച കേസിൽ യുവ ഡോക്ടറടക്കം രണ്ട് പേർ അറസ്റ്റിൽ. ഇടുക്കി കാമാക്ഷി ഗവ.കുടുംബാരോഗ്യ കേന്ദ്രത്തിലെ തിരുവല്ല സ്വദേശി ഡോ.വി.ജിത്ത് (34), തൊടുപുഴയിൽ സ്വകാര്യ സ്ഥാപനത്തിലെ ജീവനക്കാരനായ കോട്ടയം പിഴക് മാനത്തൂർ സ്വദേശിയായ ടിനു തോമസ് (23) എന്നിവരെയാണ് ജില്ലാ പൊലീസ് മേധാവി ആർ.കറുപ്പുസ്വാമിയുടെ നേതൃത്വത്തിലുള്ള പ്രത്യേക സംഘം അറസ്റ്റു ചെയ്തത്. ഡോക്ടറുടെ മൊബൈൽ ഫോണിൽ നിന്നും ലാപ് ടോപ്പിൽ നിന്നും നിരവധി നഗ്നചിത്രങ്ങളും വീഡിയോ ദൃശ്യങ്ങളും പൊലീസ് കണ്ടെടുത്തു. ടിനു തോമസിന്റെ മൊബൈൽ ഫോണിൽ നിന്നും അശ്ലീല ചിത്രങ്ങൾ സൈബർ സെൽ പരിശോധനയിൽ കണ്ടെത്തി. കുട്ടികൾക്ക് നേരെയുള്ള അതിക്രമങ്ങളും പീഡനങ്ങളും സംബന്ധിച്ച് അന്വേഷിക്കുന്ന കേരള പൊലീസിന്റെ പി. ഹണ്ട് ഓപ്പറേഷനിലൂടെയാണ് ഇവരെ കുടുക്കിയത്. ഇൻസ്‌പെക്ടർ എ. അജിത്ത്, എസ്.ഐ പി. രഘുവരൻ എന്നിവരുടെ നേതൃത്വത്തിൽ ഇന്നലെ ഉച്ചയോടു കൂടി ഇവരെ കസ്റ്റഡിയിലെടുത്ത് തങ്കമണി പൊലീസ് സ്റ്റേഷനിലെത്തിച്ച് അറസ്റ്റ് രേഖപ്പെടുത്തി. ഡോക്ടർ സ്ഥിരം ജീവനക്കാരനല്ല. പ്രതികളെ ഇന്ന് കോടതിയിൽ ഹാജരാക്കും.