കുടയത്തൂർ: പമ്പിങ്ങിലെ തകരാർ മൂലം കുടയത്തൂർ പഞ്ചായത്തിൽ കുടിവെള്ള വിതരണം മുടങ്ങുന്നു. കാഞ്ഞാർ പമ്പ് ഹൗസിലെ മോട്ടോർ രണ്ടാഴ്ച മുൻപ് നന്നാക്കിയെങ്കിലും വീണ്ടും കേടായി. അടിക്കടിയുള്ള ഈ തകരാർ മൂലം കുടയത്തൂർ, കൂവപ്പള്ളി,കോളപ്ര ഭാഗത്തേക്കുള്ള കുടിവെള്ള വിതരണം വീണ്ടും തടസ്സപ്പെട്ടു. കാഞ്ഞാർ പാലത്തിന് സമീപമുള്ള പമ്പ് ഹൗസിൽ നിന്നും കൂവപ്പള്ളി ഭാഗത്തുള്ള വാട്ടർ ടാങ്കിലേക്ക് വെള്ളം എത്തിച്ച് അവിടെ നിന്നുമാണ് പഞ്ചായത്തിന്റെ വിവിധ ഭാഗങ്ങളിലേക്ക് ജലവിതരണം നടത്തുന്നത്. നിരന്തരം മോട്ടർ കേടാകുന്നതിനാൽ ജലവിതരണം താറുമാറായ അവസ്ഥയാണ്. മലങ്കര ജലാശയത്തിലെ ജലനിരപ്പ് താഴ്ന്നതിനാൽ പലയിടത്തും വെള്ളം പമ്പ് ചെയ്യാൻ സാധിക്കുന്നില്ല. ജലനിരപ്പ് താഴ്ന്ന് നിൽക്കുന്നതിനാൽ ചെളിയും മണലും ഫുട്ട് വാൽവിലൂടെ മോട്ടറിൽ എത്തിയാണ് കേടാകുന്നത്. ഒരു സ്പെയർ മോട്ടർ പഞ്ചായത്തിന് ഉണ്ടെങ്കിലും അതും കേടായി ഇരിക്കുകയാണ്. അതിനാൽ സ്പെയർ മോട്ടർവെച്ച് പമ്പിങ് പുനരാരംഭിക്കുവാൻ സാധിക്കുന്നില്ല. കോളപ്ര ഏഴാംമൈൽ അമ്പലംകുന്ന് ഭാഗത്തേക്ക് പമ്പിങ് നടക്കുന്ന സമയത്തും വെള്ളം എത്തുന്നുണ്ടായിരുന്നില്ല. ഇവിടുത്തുകാർ പണം മുടക്കി ലോറിയിൽ വെള്ളം എത്തിച്ചാണ് കഴിഞ്ഞിരുന്നത്. മലങ്കര ജലാശയത്തിനോട് ചേർന്ന് കിടക്കുന്ന പഞ്ചായത്ത് ആയിട്ടും മുടക്കമില്ലാതെ കുടിവെള്ളം എത്തിക്കുവാൻ അധികൃതർക്ക് കഴിയുന്നില്ല. കിണർ സൗകര്യം ഇല്ലാത്ത ഭൂരിഭാഗം ജനങ്ങൾക്കും ആശ്രയമായ കുടിവെള്ള വിതരണമാണ് അധികൃതരുടെ അനാസ്ഥ മൂലം മുടങ്ങുന്നത്.