പഴയങ്ങാടി: മാടായിപ്പാറയിൽ വച്ച് പരസ്യമദ്യപാനം നടത്തിയ വീട്ടിൽ നിരീക്ഷണത്തിൽ കഴിയുന്ന രണ്ടുപേരടക്കം നാലുപേരെ സർക്കാർ ക്വാറന്റൈനിലാക്കി. ചെന്നൈയിൽ നിന്ന് ഒരാഴ്ചയ്ക്ക് മുമ്പ് എത്തി ആരോഗ്യ വകുപ്പിന്റെ നിർദ്ദേശപ്രകാരം മാടായിപ്പാറയിലെ വീട്ടിൽ ക്വാറന്റൈനിൽ കഴിയുകയായിരുന്ന രണ്ട് പേർ പറശ്ശിനിക്കടവ് മമ്പാല സ്വദേശികളായ രണ്ട് പേരുമായി ചേർന്ന് മാടായിപ്പാറയിൽ വച്ച് മദ്യപിക്കുന്നത് നാട്ടുകാർ പഴയങ്ങാടി പൊലീസിൽ അറിയിക്കുകയായിരുന്നു. പഴയങ്ങാടി എസ്.ഐ കെ.ഷാജുവിന്റെ നേതൃത്വത്തിൽ എത്തിയ സംഘം ഇവരെ പിടികൂടി എപ്പിഡമിക്ക് ഡിസീസ് ആക്ട് പ്രകാരം കേസെടുത്ത് മാടായിയിൽ പ്രവർത്തിക്കുന്ന സർക്കാർ ക്വാറന്റൈൻ കേന്ദ്രത്തിലേക്ക് മാറ്റുകയായിരുന്നു.