കണ്ണൂർ: ജില്ലയിൽ അഞ്ചു പേർക്കു കൂടി ഇന്നലെ കൊവിഡ് 19 സ്ഥിരീകരിച്ചതായി ജില്ലാ കലക്ടർ അറിയിച്ചു. മൂന്നു പേർ ഇതര സംസ്ഥാനങ്ങളിൽ നിന്നും ഒരാൾ കുവൈറ്റിൽ നിന്നും വന്നവരാണ്. ഒരാൾക്ക് സമ്പർക്കത്തിലൂടെയാണ് രോഗബാധ.
കണ്ണൂർ വിമാനത്താവളം വഴി ഐഎക്സ് 1790 വിമാനത്തിൽ മേയ് 30നാണ് കടന്നപ്പള്ളി പാണപ്പുഴ സ്വദേശിയായ 45കാരൻ കുവൈത്തിൽ നിന്ന് എത്തിയത്. കണ്ണപുരം സ്വദേശി 25കാരൻ 29ന് മുംബൈയിൽ നിന്ന് ഇൻഡിഗോ 6ഇ 5354 വിമാനത്തിൽ ബെംഗളൂരുവിലും അവിടെ നിന്ന് ഇൻഡിഗോ 6ഇ 7974 വിമാനത്തിൽ കണ്ണൂരിലുമെത്തി. മുണ്ടേരി സ്വദേശികളായ 67കാരനും 57കാരനും മെയ് 25ന് ചെന്നൈയിൽ നിന്നെത്തിയവരാണ്. ധർമടം സ്വദേശിയായ 27കാരിക്കാണ് സമ്പർക്കത്തിലൂടെ രോഗബാധ സ്ഥിരീകരിച്ചത്.

ഇതോടെ ജില്ലയിൽ കോവിഡ് ബാധിതരുടെ എണ്ണം 236 ആയി. ഇതിൽ 128 പേർ രോഗം ഭേദമായി ആശുപത്രി വിട്ടു. പരിയാരം മെഡിക്കൽ കോളേജിൽ ചികിത്സയിലായിരുന്ന പാട്യം സ്വദേശി ഒൻപത് വയസ്സുകാരിയാണ് രോഗം ഭേദമായി ഇന്നലെ വീട്ടിലേക്ക് മടങ്ങിയത്.
നിലവിൽ ജില്ലയിൽ 9459 പേരാണ് നിരീക്ഷണത്തിലുള്ളതെന്ന് ജില്ലാ മെഡിക്കൽ ഓഫീസർ അറിയിച്ചു. ഇതുവരെയായി ജില്ലയിൽ നിന്നും 7542 സാമ്പിളുകൾ പരിശോധനയ്ക്കയച്ചതിൽ 6769 എണ്ണത്തിന്റെ ഫലം ലഭ്യമായി. 6344 എണ്ണത്തിന്റെ ഫലം നെഗറ്റീവാണ്. 773 എണ്ണത്തിന്റെ ഫലം ലഭിക്കാനുണ്ട്.