ഇരിട്ടി: ഉളിയിൽ കൂരൻമുക്കിൽ എക്‌സൈസ് സംഘം നടത്തിയ പരിശോധനയിൽ വൻ മദ്യശേഖരവും പാൻ ഉത്പന്നങ്ങളും പിടികൂടി. കൂരൻമുക്ക് പെരിയത്തിൽ റോഡിലെ റഷീദിന്റെ (50) വീട്ടിൽ നിന്നാണ് 54 കുപ്പി കർണാടക മദ്യവും, 4000ത്തോളം പാക്കറ്റ് നിരോധിത പുകയില ഉൽപന്നങ്ങളും ചാരായം വാറ്റാനായി പാകപെടുത്തിയ 58 ലിറ്റർ വാഷും പിടിച്ചെടുത്തത്.

മട്ടന്നൂർ എക്‌സൈസ് ഇൻസ്‌പെക്ടർ എ.കെ. വിജേഷിന് ലഭിച്ച രഹസ്യവിവരത്തിന്റെ അടിസ്ഥാനത്തിലായിരുന്നു പരിശോധന . റഷീദിനെ അറസ്റ്റ് ചെയ്ത്‌ കോടതിയിൽ ഹാജരാക്കി. റഷീദിനൊപ്പമുണ്ടായിരുന്ന മറ്റൊരാളെ കൂടി പിടികിട്ടാനുണ്ടെന്ന് എക്‌സൈസ് ഇൻസ്‌പെക്ടർ പറഞ്ഞു. നേരത്തെയും ഈ മേഖല കേന്ദ്രീകരിച്ച് വ്യാപകമായ തോതിൽ മദ്യമുൾപ്പടെയുള്ള ലഹരി ഉൽപന്നങ്ങൾ വിറ്റഴിക്കുന്നതായി റിപ്പോർട്ടുണ്ടായിരുന്നു. പ്രവന്റിവ് ഓഫീസർമാരായ പി.കെ.അനിൽകുമാർ, കെ.പി. ഹംസക്കുട്ടി, കെ.കെ. ഷാജി, സി.ഇ.ഒ സതീഷ്, കെ.പി സുനിൽ എന്നിവരും സംഘത്തിലുണ്ടായിരുന്നു.