പഴയങ്ങാടി: മാട്ടൂൽ നോർത്ത്, കക്കാടൻചാൽ മേഖലകളിൽ കടലാക്രമണം രൂക്ഷം. നിരവധി മത്സ്യത്തൊഴിലാളി കുടുംബങ്ങൾ കടലാക്രമണ ഭീഷണിയിലാണ്. പ്രദേശത്തെ റോഡുകളും പൂർണ്ണമായും തകർന്നു. ജനവാസ കേന്ദ്രങ്ങളിലേക്ക് വെള്ളം ഇരച്ചു കയറിയത് നാട്ടുകാരെ ഏറെ ഭീതിയിലാഴ്ത്തി.

ശക്തമായ മഴയ്ക്കൊപ്പം കടലാക്രമണം കൂടിയായതോടെ ഏറെ ദുരിതത്തിലായിരിക്കുകയാണ് തീരദേശവാസികൾ. കടലാക്രമണം തടയുന്നതിന് ആവശ്യമായ നടപടികൾ അധികൃതർ സ്വീകരിക്കാത്തതാണ് പ്രദേശത്തെ രൂക്ഷമായ കടലാക്രമണത്തിന് കാരണമെന്ന് പ്രദേശവാസികൾ പറയുന്നു. കക്കാടൻചാൽ ഭാഗത്ത് കടൽഭിത്തി ഇല്ലാത്തതാണ് പ്രദേശം കടലാക്രമണ ഭീഷണി നേരിടുന്നതിന് കാരണം. കടൽഭിത്തി നിർമ്മിക്കുന്നതിന് ആവശ്യമായ നടപടികൾ അടിയന്തരമായി എടുക്കണമെന്നാണ് മത്സ്യ തൊഴിലാളികളുടെ ആവശ്യം.