കാസർകോട് : ജില്ലയിൽ ഇന്നലെ ഒമ്പത് പേർക്കു കൂടി കൊവിഡ് 19 സ്ഥിരീകരിച്ചു .ഇതിൽ ഏഴ് പേർ വിദേശത്ത് നിന്ന് വന്നവരും രണ്ടു പേർ മുബൈയിൽ നിന്ന് വന്നവരുമാണ്. ജൂൺ 7 ന് ഖത്തറിൽ നിന്ന് വന്ന 30 വയസുള്ള ഉദുമ സ്വദേശി, മേയ് 30 ന് കുവൈത്തിൽ നിന്ന് വന്ന 33 വയസുള്ള ചെറുവത്തൂർ സ്വദേശി, മേയ് 29 ന് ദുബായിൽ നിന്നെത്തിയ 51 വയസുള്ള പള്ളിക്കര സ്വദേശി, മേയ് 26ന് ദുബായിൽ നിന്നെത്തിയ 30 വയസുള്ള കാറഡുക്ക സ്വദേശിനി, ജൂൺ 11 ന് കുവൈത്തിൽ നിന്നെത്തിയ 45 വയസുള്ള കരിന്തളം സ്വദേശി, മേയ് 30ന് ദുബായിൽ നിന്നെത്തിയ 26 വയസുള്ള ചെങ്കള സ്വദേശിനി, മേയ് 30ന് കുവൈത്തിൽ നിന്നെത്തിയ 62 വയസുള്ള കാഞ്ഞങ്ങാട് എന്നിവർക്കാണ് കൊവിഡ് പോസിറ്റീവായത്. മേയ് 26ന് ട്രെയിനിന് വന്ന 31 വയസുള്ള കാറഡുക്ക സ്വദേശി, ജൂൺ നാലിന് ട്രെയിനിന് വന്ന 47 വയസുള്ള കുമ്പള സ്വദേശി എന്നിവർക്കും രോഗം സ്ഥിരീകരിച്ചു.

ജില്ലയിൽ ആറ് പേർക്ക് ഇന്നലെ നെഗറ്റീവായതായി ഡി.എം. ഒ ഡോ. എ.വി രാംദാസ് അറിയിച്ചു. മഹാരാഷ്ട്രയിൽ നിന്നെത്തിയ 57 വയസുള്ള പുത്തിഗെ സ്വദേശി, 52 വയസുള്ള കുംബഡാജെ സ്വദേശി, 54 വയസുള്ള വോർക്കാടി സ്വദേശി, 40 വയസുള്ള മീഞ്ച സ്വദേശി, 32 വയസുള്ള കുമ്പള സ്വദേശി, ദുബായിൽ നിന്നെത്തിയ 58 വയസുള്ള ഉദുമ സ്വദേശി എന്നിവർക്ക് രോഗം ഭേദമായി.