കാസർകോട്: ജില്ലയിൽ ഇന്നലെ കൊവിഡ് രോഗം സ്ഥിരീകരിച്ചത് ആറ് പുരുഷന്മാർക്ക്. ചികിത്സയിലുണ്ടായിരുന്ന ഒരാൾ രോഗമുക്തിയും നേടി.

ഈ മാസം ഏഴിന് ട്രെയിനിൽ മഹാരാഷ്ട്രയിൽ നിന്ന് വന്ന പടന്ന സ്വദേശികളായ അച്ഛനും മകനും രോഗം സ്ഥിരീകരിച്ചു. ഏഴിന് മഹാരാഷ്ട്രയിൽ നിന്ന് ട്രെയിനിൽ വന്ന 37 വയസുള്ള മംഗൽപാടി സ്വദേശി, ജൂൺ ഒന്നിന് യു.എ.ഇയിൽ നിന്ന് കണ്ണൂർ വിമാനത്താവളം വഴി വന്ന 27 വയസുള്ള ബേഡഡുക്ക സ്വദേശി. മേയ് 28 ന് യു.എ.ഇയിൽ നിന്നുവന്ന 56 വയസുള്ള പള്ളിക്കര സ്വദേശി, ജൂൺ നാലിന് ഹരിയാനയിൽ നിന്ന് വന്ന 36 വയസുള്ള കിനാനൂർ കരിന്തളം സ്വദേശി എന്നിവർക്കും കൊവിഡ് 19 പോസിറ്റീവായി.

ഇതിൽ ബേഡഡുക്ക മംഗൽപാടി സ്വദേശികൾ സർക്കാർ നിയന്ത്രണത്തിലുള്ള ക്വാറന്റീൻ സംവിധാനത്തിലും മറ്റുള്ളവർ വീടുകളിലും നിരീക്ഷണത്തിലായിരുന്നു.

മഹാരാഷ്ട്രയിൽ നിന്ന് വന്ന 30 വയസുള്ള കുമ്പള സ്വദേശിയാണ് രോഗമുക്തനായത്. ഇദ്ദേഹം കാസർകോട് ഗവ.മെഡിക്കൽ കോളേജ് കൊവിഡ് ആശുപത്രിയിൽ ചികിത്സയിലായിരുന്നു