കാസർകോട്: ജില്ലയിൽ ഇന്നലെ ഒമ്പത് പേർക്ക് കൂടി കൊവിഡ് 19 സ്ഥിരീകരിച്ചു. ഏഴു പേർ വിദേശത്ത് നിന്ന് വന്നവരും രണ്ടു പേർ മഹാരാഷ്ട്രയിൽ നിന്ന് വന്നവരുമാണ്. ഇന്നലെ ആർക്കും കൊവിഡ് നെഗറ്റീവായിട്ടില്ലെന്ന് ഡി.എം.ഒ ഡോ. എ. വി. രാംദാസ് അറിയിച്ചു.

ജൂൺ 12 ന് കുവൈത്തിൽ നിന്ന് വന്ന 46 വയസുള്ള നീലേശ്വരം സ്വദേശി, 11 ന് കുവൈത്തിൽ നിന്ന് വന്ന 23 വയസുള്ള ഈസ്റ്റ് എളേരി സ്വദേശി, മേയ് 30 ന് ദുബായിൽ നിന്നെത്തിയ 26 വയസുള്ള കാഞ്ഞങ്ങാട് സ്വദേശിനി, 31 ന് ദുബായിൽ നിന്നെത്തിയ 49 വയസുള്ള കാഞ്ഞങ്ങാട് സ്വദേശി, ജൂൺ 10 ന് കുവൈത്തിൽ നിന്ന് വന്ന 39 വയസുള്ള ബളാൽ സ്വദേശി, ഒമ്പതിന് ബഹ്റിനിൽ നിന്ന് വന്ന 34 വയസുള്ള പള്ളിക്കര സ്വദേശി, ഏഴിന് ദുബായിൽ നിന്ന് വന്ന 47 വയസുള്ള കുമ്പള സ്വദേശി എന്നിവർക്കും മേയ് 30 ന് ബസിന് വന്ന 68 വയസുള്ള മഞ്ചേശ്വരം സ്വദേശി, 20 ന് ടാക്സി കാറിൽ വന്ന 51 വയസുള്ള തൃക്കരിപ്പൂർ സ്വദേശിനി എന്നിവർക്കുമാണ് കൊവിഡ് പോസിറ്റീവായത്

നിരീക്ഷണത്തിൽ 3641 പേർ

വീടുകളിൽ 3328 പേരും സ്ഥാപന നിരീക്ഷണത്തിൽ 313 പേരുമുൾപ്പെടെ ജില്ലയിൽ നിരീക്ഷണത്തിലുള്ളത് 3641 പേരാണ്. 476 പേരുടെ പരിശോധനാ ഫലം ലഭിക്കാനുണ്ട്. പുതിയതായി 94 പേരുടെ സാമ്പിളുകൾ പരിശോധനയ്ക്ക് അയച്ചു. 255 പേർ നിരീക്ഷണ കാലയളവ് പൂർത്തിയാക്കി.