കണ്ണൂർ: ജില്ലയിൽ 23 സി.ഐ.എസ്.എഫ് ഉദ്യോഗസ്ഥർ ഉൾപ്പെടെ 26 പേർക്ക് ഇന്നലെ കൊവിഡ് സ്ഥിരീകരിച്ചതായി ജില്ലാ കളക്ടർ അറിയിച്ചു. മറ്റു മൂന്നു പേർ വിദേശത്തു നിന്നു വന്നവരാണ്.
ജൂൺ 20ന് മസ്‌കറ്റിൽ നിന്നെത്തിയ എരമം കുറ്റൂർ സ്വദേശി 39കാരൻ, 24ന് കുവൈറ്റിൽ നിന്നെത്തിയ ഏഴോം മൂന്നാംപീടിക സ്വദേശി 43കാരൻ, 11ന് കുവൈറ്റിൽ നിന്നെത്തിയ ചിറക്കൽ സ്വദേശി 44കാരൻ എന്നിവരാണ് വിദേശത്തു നിന്നെത്തിയവർ.
കേരളത്തിൽ നിന്നുള്ള ഏഴു പേർ, ഉത്തർപ്രദേശ് സ്വദേശികളായ അഞ്ച് പേർ, തമിഴ്നാട്, ബീഹാർ, ഹരിയാന, രാജസ്ഥാൻ സ്വദേശികളായ ഈരണ്ടു പേർ, ഹിമാചൽ പ്രദേശ്, ഉത്തരാഖണ്ഡ്, പഞ്ചാബ് സ്വദേശികളായ ഒരാൾ വീതം എന്നിങ്ങനെയാണ് രോഗം സ്ഥിരീകരിച്ച സി.ഐ.എസ്.എഫ് ഉദ്യോഗസ്ഥരുടെ എണ്ണം.
ഇതോടെ ജില്ലയിൽ കൊവിഡ് ബാധിതരുടെ എണ്ണം 471 ആയി. ഇവരിൽ 280 പേർ രോഗം ഭേദമായി ആശുപത്രി വിട്ടു. തലശ്ശേരി ജനറൽ ആശുപത്രിയിൽ ചികിത്സയിലായിരുന്ന കോട്ടയം മലബാർ സ്വദേശി 64കാരൻ, ജില്ലാ ആശുപത്രിയിൽ ചികിത്സയിലായിരുന്ന ആലക്കോട് തേർത്തല്ലി സ്വദേശി അഞ്ചു വയസ്സുകാരൻ എന്നിവർ ഇന്നലെയാണ് വീടുകളിലേക്ക് മടങ്ങിയത്.
നിലവിൽ ജില്ലയിൽ നിരീക്ഷണത്തിലുള്ളത് 22664 പേരാണ്. ജില്ലയിൽ നിന്ന് ഇതുവരെ 14420 സാംപിളുകൾ പരിശോധനയ്ക്ക് അയച്ചതിൽ 13556 എണ്ണത്തിന്റെ ഫലം വന്നു. ഇതിൽ 12747 എണ്ണം നെഗറ്റീവാണ്. 864 എണ്ണത്തിന്റെ ഫലം ലഭിക്കാനുണ്ട്.