കൊണ്ടോട്ടി: നിരോ​ധി​ത എൽ​.എ​സ്​.ഡി, എം.ഡി.എ മ​യ​ക്കു​മ​രു​ന്നു​ക​ളു​മാ​യി രണ്ട് യുവാക്കളെ കൊണ്ടോട്ടി പൊലീസ് അറസ്റ്റ് ചെയ്തു. കോ​ഴി​ക്കോ​ട് മാ​ങ്കാ​വ് വീ​ട്ടി​ലകത്ത് ഹിജാ​സ് (22), കല്ലായി അ​മൻ വീ​ട്ടിൽ അ​കീൽ (20) എ​ന്നി​വരാണ് പിടിയിലായത്. അരലക്ഷം രൂപയുടെ മയക്കുമരുന്നും ഇവരിൽ നിന്ന് പിടിച്ചെടുത്തു. കോഴിക്കോ​ട്, മലപ്പുറം ജില്ലകളിലെ കോളേജുകളും സ്കൂളുകളും കേന്ദ്രീകരിച്ച് മയക്കുമ​രുന്നു വില്പന നടത്തുന്ന സംഘത്തിലെ പ്രധാനികളാ​ണിവരെന്ന് പൊലീസ് പറഞ്ഞു.

മയക്കുമരുന്നു കടത്താനുപയോഗിച്ച ബൈക്കും ഇവരിൽ നിന്നു കണ്ടെടുത്തു. ഗോ​വ, ബംഗളൂരു എന്നിവിടങ്ങളിൽ നിന്നെത്തിക്കുന്ന മയക്കുമരുന്ന് വിപണനത്തിന്കോളേജ് വിദ്യാർത്ഥികളെയാണ് ഇവർ ഉപയോഗിക്കുന്ന​ത്. ഡോസിനനുസരിച്ച് വിവിധ പേരുകളിലാണ് എം.ഡി.എ സ്റ്റാമ്പുകൾ അറിയപ്പെടുന്നത്. 2000 രൂപ നിരക്കി​ലാ​യിരുന്നു വി​ല്പന. കൊറിയർ സർവീസ് വഴിയും മയക്കുമ​രുന്നെത്തിച്ചിട്ടുണ്ട്.
ചെറിയ അളവിൽ കൈവശം വച്ചാൽ പോലും 20 വർഷത്തിലധികം തടവും പിഴയും ലഭിക്കുന്ന വിഭാഗത്തിൽപ്പെട്ട മയക്കുമരുന്നാണ് ഇവരിൽ നിന്ന് കണ്ടെത്തിയ​ത്. ഇവരിൽ നിന്ന് മലപ്പുറം, കോഴിക്കോട് ജില്ലകൾ കേന്ദ്രീകരിച്ച് വിദ്യാർത്ഥികൾക്കിടയിൽ മയക്കുമരുന്ന് വിൽക്കുന്ന സംഘങ്ങളെ കുറിച്ച് വ്യക്തമായ സൂചന ലഭിച്ചു.

മലപ്പുറം ജില്ലാ പൊലീസ് മേധാവി യു. അബ്ദുൽ കരീമിന് ലഭിച്ച രഹസ്യ വിവരത്തിന്റെ അടിസ്ഥാനത്തിൽ മലപ്പുറം ഡിവൈ.എസ്.പി ജലീൽ തോട്ടത്തിലിന്റെ നിർദ്ദേശ പ്രകാരം കൊണ്ടോട്ടി​ ​ഇൻസ്‌പെ‌ക്ടർ ബിജു, എസ്.ഐ മോഹനൻ എന്നിവരുടെ നേതൃത്വത്തിൽ ജില്ലാ ആൻഡി നർക്കോട്ടിക്ക് സ്ക്വാഡ്‌ അംഗങ്ങളായ അബ്ദുൾ അസീസ്, സത്യനാഥൻ മനാട്ട്, ശശി കുണ്ടറക്കാട്, പി. സഞ്ജീവ്, ശ്രീജിത്ത് എന്നിവരാണ് പ്രതികളെ പിടികൂടിയത്.