 കടയുടമ അറസ്റ്റിൽ

നരിക്കുനി: രാത്രി പോത്ത് മോഷണം; പകൽ സ്വന്തം കടകളിൽ ഇറച്ചി വില്പനയും. കവർച്ചക്കാരനായ ഈ കടയുടമ ഒടുവിൽ പിടിയിലായി.
പടനിലത്ത് നിന്ന് പോത്തിനെ കവർന്ന നരിക്കുനി ചെമ്പക്കുന്ന് കൂടത്തൻകണ്ടി ജാബിറിനെയാണ് കുന്ദമംഗലം പൊലീസ് പിടികൂടിയത്. ഇയാൾക്ക് താമരശ്ശേരി കെടവൂർ ജുമാ മസ്ജിദിനു മുന്നിലും നരിക്കുനി കുമാരസ്വാമി റോഡിലും ഇറച്ചിക്കടകളുണ്ട്.

ഇറച്ചി കച്ചവടക്കാരൻ പടനിലം സ്വദേശി അഷറഫിന്റെ പോത്തുകളിൽ മൂന്നെണ്ണത്തെ കഴിഞ്ഞ ദിവസം കാണാതായതിനെ തുടർന്ന് കുന്ദമംഗലം പൊലീസിൽ പരാതി നൽകുകയായിരുന്നു. തുടർന്നുള്ള അന്വേഷണത്തിൽ ഒരു പോത്തിനെ നരിക്കുനിയിൽ നിന്നു കണ്ടെത്തി. പരിസരങ്ങളിലെ സി സി ടി വി പരിശോധിച്ചതോടെയാണ് കള്ളൻ കുടുങ്ങിയത്.

ചോദ്യം ചെയ്യലിൽ മൂന്നു പോത്തിനേയും മോഷ്ടിച്ചത് താനാണെന്ന് പ്രതി കുറ്റമേറ്റു. രണ്ടു പോത്തുകളെ അറുത്ത് വില്പന നടത്തിക്കഴിഞ്ഞിരുന്നു. കണ്ടെത്തിയ പോത്തിനെ ഉടമയ്ക്ക് പോലീസ് വിട്ടു കൊടുത്തു.

താമരശ്ശേരി ഭാഗത്തും ഇത്തരത്തിലുള്ള മോഷണം നടന്നതായി പരാതികൾ ഉയർന്നിട്ടുണ്ട്. കലറക്കാംപൊയിൽ സുലൈമാന്റെ ചുങ്കത്തെ പറമ്പിൽ കെട്ടിയിരുന്ന പോത്തിനെ കാണാതായിരുന്നു. ചില കോഴിക്കടകളിൽ പുറത്തിറക്കി വെച്ച കോഴിപ്പെട്ടികൾ രാത്രി കാണാതായതായും പരാതികളുണ്ട്. സംഭവത്തിൽ കൂടുതൽ അന്വേഷണം നടത്തും.