കൽപ്പറ്റ: ജില്ലയിൽ കൊവിഡ് സ്ഥിരീകരിച്ച് ചികിൽസയിൽ കഴിഞ്ഞിരുന്ന 5 പേർക്ക് കൂടി രോഗമുക്തി. നല്ലൂർനാട് സ്വദേശി (30), പള്ളിക്കുന്ന് സ്വദേശി (25), ബത്തേരിയിലെ അന്യസംസ്ഥാന തൊഴിലാളി (30), മേപ്പാടി സ്വദേശി (27), നെന്മേനി സ്വദേശി (22) എന്നിവരാണ് രോഗമുക്തരായത്.

സാമ്പിൾ പരിശോധന നെഗറ്റീവായതിനെ തുടർന്ന് ജില്ലാ ആശുപത്രിയിൽ നിന്ന് ഇവരെ ഡിസ്ചാർജ് ചെയ്തു. നിലവിൽ രോഗം സ്ഥിരീകരിച്ച് 16 പേർ മാനന്തവാടി ജില്ലാ ആശുപത്രിയിലും ഒരാൾ കോഴിക്കോട് ബീച്ച് ആശുപത്രിയിലും ചികിത്സയിലുണ്ട്.
264 പേർ നിരീക്ഷണ കാലം പൂർത്തിയാക്കി
ചൊവ്വാഴ്ച്ച പുതുതായി നിരീക്ഷണത്തിലായ 266 പേർ ഉൾപ്പെടെ നിലവിൽ 3421 പേർ നിരീക്ഷണത്തിലുണ്ട്. ഇതിൽ 30 പേർ മാനന്തവാടി ജില്ലാ ആശുപത്രിയിൽ നിരീക്ഷണത്തിലാണ്. അതേസമയം ചൊവ്വാഴ്ച്ച 264 പേർ നിരീക്ഷണകാലം പൂർത്തിയാക്കി.
ജില്ലയിൽ നിന്ന് ഇതുവരെ പരിശോധനയ്ക്ക് അയച്ച 2577 ആളുകളുടെ സാമ്പിളുകളിൽ 2162 ആളുകളുടെ ഫലം ലഭിച്ചതിൽ 2122 നെഗറ്റീവാണ്. 410 സാമ്പിളുകളുടെ ഫലം ലഭിക്കാനുണ്ട്. സാമൂഹ്യ വ്യാപനം നടന്നിട്ടുണ്ടോ എന്ന് പരിശോധിക്കുന്നതിന്റെ ഭാഗമായി ജില്ലയിൽ നിന്നും ആകെ 3449 സാമ്പിളുകൾ പരിശോധനയ്ക്കായി അയച്ചിട്ടുണ്ട് .ഇതിൽ ഫലം ലഭിച്ച 2788 ൽ 2771 നെഗറ്റീവാണ്. 661 സാമ്പിളുകളുടെ ഫലം ലഭിക്കാനുണ്ട്. ജില്ലാ മാനസികാരോഗ്യ പരിപാടിയുടെ നേതൃത്വത്തിൽ നിരീക്ഷണത്തിൽ കഴിയുന്ന 229 പേർക്ക് കൗൺസലിംഗ് നൽകി.