ഫറോക്ക്: ​ഒറ്റമുറി വീട്ടിൽ 13 വർഷം ഇരുട്ടിൽ കഴിഞ്ഞ വയോധികയ്ക്ക് വൈദ്യുതി കണക്ഷൻ നൽ​കി മാറാട് ജനമൈത്രി ​പൊ​ലീസ്. അരക്കിണർ സാഗരസരണിക്കടുത്ത് അണ്ടടി​പറമ്പിൽ താമസിക്കുന്ന 66കാരി മുതിരാക്കോട്ട് സുലോചനയ്ക്കാണ് പൊ​ലീസിന്റെ സഹായമെത്തിയത്. ലോക്ക് ഡൗണിൽ ദുരി​തമനുഭവിക്കുന്നവരെയും തനിച്ച് താമസിക്കുന്നവരെയും കണ്ടെത്താൻ മാറാട് ജനമൈത്രി ബീറ്റ് ഓഫീസർമാരായ എ.എസ്.ഐ ധനേഷ്‌കുമാ​റും ​സിവിൽ ​പൊ​ലീസ് ഓഫീസർ സുജാതയും നടത്തിയ അന്വേഷണത്തിലാണ് സുലോചനയെ കണ്ടെത്തിയത്. അവിവാഹിതയായ ​ ഇവർ ബന്ധുക്കളിൽ നിന്ന് അകന്ന് കഴിയുകയായിരുന്നു. പെൻഷൻ മാത്രമായിരുന്നു ജീവിത മാർഗം. ആദ്യം ഭക്ഷണക്കിറ്റും വിളക്ക് കത്തിക്കാൻ മണ്ണെണ്ണയും നൽകിയ പൊലീസ് വീട് വയറിംഗ് ചെയ്യുന്നതിന് ഏർപ്പാടാക്കുകയും കെ.എസ്.ഇ.ബിയിൽ അപേക്ഷ നൽകി വീട്ടിൽ വൈദ്യുതി എത്തിക്കുകയുമായിരുന്നു. മാറാട് ​ എസ് .എച്ച്.ഒ ​ ​കെ.വിനോദൻ സ്വി​ച്ച് ഓൺ കർമ്മം നിർവഹിച്ചു. ജനമൈത്രി ബീറ്റ് ഓഫീസർ എ.എസ്.ഐ ധനേഷ്​കുമാർ, സീനിയർ സിവിൽ പൊലീസ് ഓഫീസർമാരായ കെ.കെ.രതീഷ് കുമാർ, കെ.ഷിനോജ്​, ബീറ്റ് ഓഫീസർ സുജാത, സിവിൽ പൊലീസ് ഓഫീസർ പി.ജി.ഷൈജിത്​ ​​എന്നിവർ പങ്കെടുത്തു.