കൊയിലാണ്ടി: നിർദ്ധന രോഗികളുടെ ചികിത്സ, മരുന്ന്, സഹായക ഉപകരണങ്ങൾ, ഭക്ഷണം എന്നിവയ്ക്ക് തുക കണ്ടെത്തുന്നതിനായി ബിരിയാണി ഫെസ്റ്റുമായി യുവാക്കൾ. സാന്ത്വനം കീഴരിയൂർ എന്ന കൂട്ടായ്മയാണ് പ്രദേശത്തെ രോഗികളെ സഹായിക്കുന്നതിനായി ബിരിയാണി ഫെസ്റ്റ് സംഘടിപ്പിച്ചത്. ബ്രെയിൻ ട്യൂമർ ബാധിച്ച പത്തുവയസ്സുകാരിയുടെ ചികിത്സയ്ക്കായി കഴിഞ്ഞ വർഷം ജൂണിൽ രൂപീകരിച്ച ഈ കൂട്ടായ്മ ഒരുവർഷത്തിനിടെ മൂന്നര ലക്ഷം രൂപയിലധികം വിവിധ രോഗികൾക്ക് നൽകി. ഫണ്ട് സമാഹരണത്തിന് കൊവിഡ് സൃഷ്ടിച്ച പ്രതിസന്ധി മറികടക്കാനാണ് ബിരിയാണി ഫെസ്റ്റ് സംഘടിപ്പിച്ചത്. വീടുകളിൽ നിന്ന് മുൻകൂർ ഓർഡർ സ്വീകരിച്ച് നൂറു രൂപ നിരക്കിൽ ആയിരത്തി അഞ്ഞൂറോളം ബിരിയാണി ഇവർ വിതരണം ചെയ്തു. കീഴരിയൂർ ഗ്രാമപഞ്ചായത്ത് ആരോഗ്യ സ്റ്റാന്റിംഗ് കമ്മിറ്റി ചെയർപേഴ്‌സൺ സാബിറ നടുക്കണ്ടിക്ക് ആദ്യപൊതി വിതരണം ചെയ്ത് മേലടി ബ്ലോക്ക് പഞ്ചായത്ത് വൈസ് പ്രസിഡന്റ് ശോഭ കാരയിൽ ഉദ്ഘാടനം ചെയ്തു. കെ. അബ്ദുറഹിമാൻ അദ്ധ്യക്ഷത വഹിച്ചു. ബ്ലോക്ക് പഞ്ചായത്ത് മെമ്പർ രാജേഷ് കീഴരിയൂർ, സമദ് തറോൽ, റിയാസ് പുതുക്കുടി, എം.ഹരിശങ്കർ എന്നിവർ പ്രസംഗിച്ചു. കെ.ടി.മുനീർ സ്വാഗതവും മുഹമ്മദ് ഷാഫി നന്ദിയും പറഞ്ഞു. ഷംസുദ്ദീൻ തയ്യിൽ, എം.കെ.മുഹമ്മദ്, പി.ആസിഫ്, എസ്.വിദീഷ്, കെ.കെ.ഷംസുദ്ദീൻ, പി.കെ.ജാബിർ, ടി.സഈദ് , ടി.പ്രകാശൻ, ടി.എം.റിഫാദ് തുടങ്ങിയവർ നേതൃത്വം നൽകി.