കോട്ടയം : ജില്ലയിൽ ഇന്നലെ വിദേശത്ത് നിന്നെത്തിയ 7 പേർക്ക് കൊവിഡ് സ്ഥിരീകരിച്ചു. ഇതിൽ അഞ്ചു പേരും കോട്ടയം കളത്തിപ്പടിയിലെ ക്വാറന്റൈൻ കേന്ദ്രത്തിലും ഒരാൾ ഹോം ക്വാറന്റൈനിലും കഴിയുകയായിരുന്നു. ആരിലും രോഗലക്ഷണങ്ങൾ പ്രകടമായിരുന്നില്ല. ഇവരിൽ പനച്ചിക്കാട് കുഴിമറ്റം സ്വദേശിനി (36), മാഞ്ഞൂർ സ്വദേശിനി (32), എരുമേലി സ്വദേശിനി (31), പനച്ചിക്കാട് സ്വദേശിനി (30) എന്നിവർ മേയ് 26 ന് കുവൈറ്റ്-കൊച്ചി വിമാനത്തിൽ എത്തിയവരാണ്. മേയ് 27 ന് കുവൈറ്റിൽനിന്നെത്തിയ പരിയാരം സ്വദേശിനിയായ നഴ്‌സിനും (27) ആണ് രോഗം സ്ഥിരീകരിച്ചത്. ദുബായിൽനിന്നെത്തി ഹോം ക്വാറന്റൈനിൽ കഴിഞ്ഞിരുന്ന ഇടയിരിക്കപ്പുഴ സ്വദേശിയായ 82 കാരനാണ് രോഗം ബാധിച്ച ആറാമത്തെയാൾ. പരിയാരം സ്വദേശിനി അഞ്ചു മാസം ഗർഭിണിയാണ്. പുതിയതായി രോഗം സ്ഥിരീകരിച്ചവർ ഉൾപ്പെടെ നിലവിൽ 16 പേരാണ് രോഗ ബാധിതരായി ചികിത്സയിലുള്ളത്. എല്ലാവരെയും കോട്ടയം മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു. ഏഴു പേർ രോഗമുക്തരായി ഇന്നലെ ആശുപത്രി വിട്ടു. ഇതോടെ ജില്ലയിൽ രോഗമുക്തരായവരുടെ എണ്ണം 34 ആയി.