കോട്ടയം: ജില്ലയിൽ ഇന്നലെ അഞ്ചു പേർക്കു കൂടി കൊവിഡ് സ്ഥിരീകരിച്ചതോടെ ആകെ രോഗികളുടെ എണ്ണം 27 ആയി. രോഗബാധിതരിൽ മൂന്നു പേർ കുവൈറ്റിൽനിന്ന് മേയ് 26നും ഒരാൾ മഹാരാഷ്ട്രയിൽ നിന്ന് മെയ് 25നും ഒരാൾ പൂനയിൽനിന്ന് മെയ് 30നുമാണ് എത്തിയത്.
നീണ്ടൂർ സ്വദേശിനി (40), ളാക്കാട്ടൂർ സ്വദേശി (25), കോട്ടയം സ്വദേശി (25) എന്നിവരാണ് കുവൈറ്റിൽനിന്ന് ഒരേ വിമാനത്തിൽ എത്തിയത്. മൂവരും കോട്ടയം കളത്തിപ്പടിയിലെ ക്വാറന്റൈൻ കേന്ദ്രത്തിലായിരുന്നു. മഹാരാഷ്ട്രയിൽനിന്ന് വിമാനമാർഗം മേയ് 25ന് എത്തിയ ഗർഭിണിയായ പാറത്തോട് സ്വദേശിനിക്ക് (31) ഹോം ക്വാറന്റൈനിൽ കഴിയുമ്പോൾ രോഗലക്ഷണങ്ങളുണ്ടായ സാഹചര്യത്തിലാണ് സാമ്പിൾ ശേഖരിച്ചത്. പൂനെയിൽനിന്ന് മെയ് 30ന് എത്തിയ തിരുവാതുക്കൽ സ്വദേശിയും (32) ഹോം ക്വാറന്റൈനിൽ കഴിയുകയായിരുന്നു.
ഇവരിൽ നാലു പേരെ കോട്ടയം ജനറൽ ആശുപത്രിയിലും ഒരാളെ കോട്ടയം മെഡിക്കൽ കോളേജ് ആശുപത്രിയിലും പ്രവേശിപ്പിച്ചു. ജില്ലയിൽ രോഗം സ്ഥിരീകരിച്ച് ചികിത്സയിലുള്ള 27 പേരിൽ 18 പേർ കോട്ടയം മെഡിക്കൽ കോളേജ് ആശുപത്രിയിലും ഒൻപതു പേർ കോട്ടയം ജനറൽ ആശുപത്രിയിലുമാണ്.
മെയ് 26ന് കുവൈറ്റ്കൊച്ചി വിമാനത്തിൽ ജില്ലയിൽ എത്തിയ 16 പേരിൽ പുതുതായി രോഗം സ്ഥിരീകരിച്ച മൂന്നു പേർ ഉൾപ്പെടെ ഒൻപതു പേർ കോവിഡ് ബാധിതരായി.