കോട്ടയം: ജില്ലയിൽ ഒരാൾക്കു കൂടി കൊവിഡ് സ്ഥിരീകരിച്ചു. മുംബയിൽനിന്ന് 27ന് വിമാനത്തിൽ എത്തിയ അതിരമ്പുഴ സ്വദേശിക്കാണ് (24) രോഗം . ഇതോടെ ജില്ലയിൽ ചികിത്സയിൽ കഴിയുന്നവരുടെ എണ്ണം 28 ആയി. ഇതിൽ 19 പേർ കോട്ടയം മെഡിക്കൽ കോളേജ് ആശുപത്രിയിലും 9 പേർ കോട്ടയം ജനറൽ ആശുപത്രിയിലുമാണ്.

ഇന്നലെ 287 സാമ്പിളുകളുടെ പരിശോധനാ ഫലമാണ് വന്നത്. ഇതിൽ 286 എണ്ണം നെഗറ്റീവാണ്. 160 സാമ്പിളുകൾ കൂടി പരിശോധനയ്ക്കയച്ചു. ജില്ലയിൽ ഇതുവരെ 4733 പേരെ സാമ്പിൾ പരിശോധനയ്ക്ക് വിധേയരാക്കി. ആകെ 64 പേരുടെ പരിശോധനാ ഫലം പോസിറ്റിവായി. ഇതിൽ 36 പേർ സുഖം പ്രാപിച്ചു.

നിലവിൽ 7169 പേർ നിരീക്ഷണത്തിൽ കഴിയുന്നു. ഇതിൽ വിദേശ രാജ്യങ്ങളിൽനിന്ന് വന്ന 1313 പേരും മറ്റു സംസ്ഥാനങ്ങളിൽനിന്ന് വന്ന 5685 പേരും രോഗം സ്ഥിരീകരിച്ചവരുടെ പ്രൈമറി കോൺടാക്ട് പട്ടികയിലുള്ള 91 പേരും സെക്കൻഡറി കോൺടാക്ടുകളായ 80 പേരും ഉൾപ്പെടുന്നു. ഇന്നലെ 275 പേരെ ക്വാറന്റൈനിൽ നിന്ന് ഒഴിവാക്കി.