കോട്ടയം: ജില്ലയിൽ മൂന്നു പേർക്കു കൂടി കൊവിഡ് സ്ഥിരീകരിച്ചു. ഒരാൾ രോഗമുക്തി നേടി. മെഡിക്കൽ കോളേജ് ആശുപത്രിയിൽ ചികിത്സയിലായിരുന്ന ചങ്ങനാശേരി മാമ്മൂട് സ്വദേശിനി (29) ആണ് രോഗം ഭേദമായതിനെത്തുടർന്ന് വീട്ടിലേക്ക് മടങ്ങിയത്. ഇതോടെ രോഗമുക്തി നേടിയവരുടെ എണ്ണം 37 ആയി.
മസ്‌കറ്റിൽനിന്ന് മെയ് 30ന് എത്തിയ പായിപ്പാട് സ്വദേശി (34)യാണ് ഇന്നലെ രോഗം സ്ഥിരീകരിച്ച ഒരാൾ. കോട്ടയത്തെ കോവിഡ് കെയർ സെന്ററിൽ കഴിയുകയായിരുന്നു. രോഗലക്ഷണങ്ങൾ ഉണ്ടായിരുന്നില്ല. ഭാര്യ കഴിഞ്ഞ ദിവസം രോഗം സ്ഥിരീകരിച്ച് മെഡിക്കൽ കോളേജ് ആശുപത്രിയിൽ ചികിത്സയിലാണ്.
മുംബയിൽനിന്ന് ട്രെയിനിൽ മെയ് 26ന് എത്തിയ ചങ്ങനാശേരി മാമ്മൂട് സ്വദേശി (31)യാണ് മറ്റൊരാൾ. എറണാകുളം വരെ ട്രെയിനിലും അവിടെനിന്ന് കോട്ടയത്തേക്ക് കെ.എസ്.ആർ.ടി.സി ബസിലും എത്തിയശേഷം ഹോം ക്വാറന്റയിനിൽ കഴിയുകയായിരുന്നു. മെയ് 27ന് മഹാരാഷ്ട്രയിൽനിന്ന് വിമാനത്തിൽ എത്തിയ കങ്ങഴ സ്വദേശിനി(24)ക്കും ഇന്നലെ രോഗം സ്ഥിരീകരിച്ചു. കങ്ങഴയിലെ നിരീക്ഷണ കേന്ദ്രത്തിൽ കഴിയുകയായിരുന്നു.
എറണാകുളം മെഡിക്കൽ കോളേജ് ആശുപത്രിയിൽ കഴിയുന്ന ഒരാൾ ഉൾപ്പെടെ കോട്ടയം ജില്ലക്കാരായ 32 പേർക്കാണ് നിലവിൽ രോഗബാധയുള്ളത്.