കോട്ടയം : ജില്ലയിൽ ഇന്നലെ മൂന്നുപേർക്ക് കൂടി കൊവിഡ് സ്ഥിരീകരിച്ചപ്പോൾ രണ്ടുപേർ രോഗമുക്തരായി.

വിദേശത്ത് നിന്നെത്തി എറണാകുളത്ത് നിരീക്ഷണത്തിൽ കഴിഞ്ഞിരുന്ന ചങ്ങനാശേരി ചീരഞ്ചിറ സ്വദേശി (58), ജൂൺ 4 ന് ചെന്നെയിൽ നിന്നെത്തിയ മുണ്ടക്കയം സ്വദേശി (23), മേയ് 29 ന് മുംബയിൽ നിന്നെത്തിയ ടി.വി.പുരം സ്വദേശി (33) എന്നിവരുടെ പരിശോധനാ ഫലമാണ് പോസിറ്റീവായത്. മുണ്ടക്കയം സ്വദേശിയും ടിവിപുരം സ്വദേശിയും ഹോം ക്വാറന്റൈനിലായിരുന്നു. ചീരഞ്ചിറ സ്വദേശി ഏഴുദിവസം എറണാകുളത്ത് ഇൻസ്റ്റിറ്റ്യൂഷണൽ ക്വാറന്റൈനിൽ താമസിച്ച ശേഷം എറണാകുളത്തെ ഒരു വീട്ടിൽ പൊതു സമ്പർക്കം ഒഴിവാക്കി കഴിയുകയായിരുന്നു. വിമാനത്തിൽ സഹയാത്രികരായിരുന്നവർക്ക് രോഗം സ്ഥിരീകരിച്ച സാഹചര്യത്തിലാണ് സാമ്പിൾ പരിശോധനയ്ക്ക് വിധേയനായത്. ഇദ്ദേഹത്തെ എറണാകുളം മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു. നേരത്തെ രോഗം സ്ഥിരീകരിച്ച കോട്ടയം സ്വദേശി ഇതേ ആശുപത്രിയിൽ ചികിത്സയിലുണ്ട്. അബുദാബിയിൽ നിന്നെത്തിയ തെക്കേത്തുകവല സ്വദേശിനി (54), കുവൈറ്റിൽ നിന്നെത്തിയ അതിരമ്പുഴ സ്വദേശിനി (40) എന്നിവരാണ് രോഗമുക്തരായതിനെത്തുടർന്ന് കോട്ടയം ജനറൽ ആശുപത്രിയിൽനിന്ന് വീട്ടിലേക്ക് മടങ്ങിയത്. ജില്ലയിൽ ഇതുവരെ 46 പേർ രോഗമുക്തി നേടി. ഇന്നലെ 190 സാമ്പിളുകൾ പരിശോധനയ്ക്ക് അയച്ചിട്ടുണ്ട്.