തിരുവനന്തപുരം: ജിബൂട്ടി എന്ന ചിത്രത്തിന്റെ ചിത്രീകരണത്തിനിടയിൽ ആഫ്രിക്കയിൽ കുടുങ്ങിയ സിനിമാ സംഘം പ്രത്യേക വിമാനത്തിൽ ഇന്നലെ വൈകിട്ട് കൊച്ചിയിലെത്തി. കൊച്ചി നെടുമ്പാശേരിയിലിറങ്ങിയ സംഘത്തിൽ നടൻ ദിലീഷ് പോത്തനടക്കം എഴുപത്തിയൊന്ന് പേരുണ്ടായിരുന്നു. നിർമ്മാതാവ് ചാർട്ട് ചെയ്ത വിമാനത്തിലാണ് ജിബൂട്ടി ടീം എത്തിയത്. എല്ലാവരും സർക്കാരിന്റെ നിർദ്ദേശ പ്രകാരം ക്വാറന്റൈനിൽ കഴിയും. ഏപ്രിൽ 18ന് ചിത്രത്തിന്റെ ഷൂട്ടിംഗ് പൂർത്തിയാക്കിയെങ്കിലും ലോക്ക് ഡൗണിനെത്തുടർന്ന് കേരളത്തിലേക്കുള്ള മടക്കയാത്ര വൈകുകയായിരുന്നു.

ജിബൂട്ടി ഗവൺമെന്റും ഇന്ത്യൻ എംബസിയും ചിത്രത്തിന്റെ നിർമ്മാതാവായ ജോബി. പി. സാമും ചേർന്ന് നടത്തിയ ശക്തമായ ഇടപെടലിനെ തുടർന്നാണ് യാത്ര സാദ്ധ്യമായത്. ഇന്ത്യയും ആഫ്രിക്കൻ രാജ്യമായ ജിബൂട്ടിയും സാംസ്കാരിക മേഖലയിൽ കൈകോർക്കുന്ന ചിത്രം കൂടിയാണിത്. നവാഗതനായ എസ്.ജെ. സിനുവാണ് സംവിധായകൻ.