ന്യൂഡൽഹി: ഇന്ത്യയിൽ കൊവിഡ് രോഗികളുടെ എണ്ണം 2,36,657 ആയി. 11,5942 പേർ ചികിത്സയിലാണ്. 6642 പേർ മരിച്ചതായി ആരോഗ്യകുടുംബക്ഷേമ വകുപ്പ് അറിയിച്ചു. രാജ്യത്ത് പ്രതിദിനം രോഗബാധിതരുടെ എണ്ണം പതിനായിരത്തിനോടടുക്കുന്നു. 9887 കൊവിഡ് കേസുകളാണ് കഴിഞ്ഞ 24 മണിക്കൂറിനിടെ ഇന്ത്യയിൽ റിപ്പോർട്ട് ചെയ്തത് 294 പേർ മരിച്ചു.

മഹാരാഷ്ട്ര, തമിഴ്നാട്, ഡൽഹി, ഗുജറാത്ത് സംസ്ഥാനങ്ങളാണ് രോഗ വ്യാപനത്തിൽ മുന്നിൽ. ഡൽഹിയിൽ ഒരാഴ്ചക്കിടെ പരിശോധന നടത്തുന്ന നാലിൽ ഒരാൾക്ക് കൊവിഡ് സ്ഥിരീകരിക്കുന്നുണ്ട്. ഇന്നലെ 1330 പേർക്ക് കൂടി കൊവിഡ് സ്ഥിരീകരിച്ചതോടെ ഡൽഹിയിലെ രോഗ ബാധിതരുടെ എണ്ണം 26334 ആയി. മരണം 708. രാജസ്ഥാനിൽ കൊവിഡ് സ്ഥിരീകരിച്ചവരുടെ എണ്ണം പതിനായിരം കടന്നു. കേരളത്തിലും രോഗബാധിതരുടെ എണ്ണം കൂടുകയാണ്.